1988 წლის შემდეგ პირველად, ტეხასის სენატის არჩევნებში დემოკრატმა გაიმარჯვა
აშშ-ის შუალედურ არჩევნებში, ტეხასის შტატის სენატორის მანდატი 37 წლის დემოკრატმა ჯეიმზ ტალარიკომ მოიპოვა. Decision Desk-ის მონაცემებით, მან რესპუბლიკელი კონკურენტი, კენ პაქსტონი დაამარცხა და შტატში რესპუბლიკური პარტიის მრავალწლიანი მონოპოლია დაასრულა.
ამ გამარჯვებით დემოკრატებმა აშშ-ის სენატზე კონტროლის დაბრუნებისკენ გადამწყვეტი ნაბიჯი გადადგეს. სენატში უმრავლესობის შესაძლო დაკარგვა კი დონალდ ტრამპის საპრეზიდენტო ვადის დარჩენილი ორი წლის საკანონმდებლო ინიციატივებს მნიშვნელოვნად შეაფერხებს.
აღსანიშნავია, რომ ტეხასის სენატორის არჩევნები აშშ-ის ისტორიაში ყველაზე ძვირად ღირებულ საარჩევნო კამპანიად იქცა. კენ პაქსტონის მხარდასაჭერად ბიზნესმენმა ილონ მასკმა დაახლოებით $168 მილიონი გამოყო. ტალარიკომ მეტოქესთან დაპირისპირება „დავითისა და გოლიათის“ ბრძოლად შეაფასა და მთავარ ლოზუნგად ფრაზა - „ტეხასი არ იყიდება“ გამოიყენა.
დემოკრატიული პარტიის მემარცხენე ფრთისგან განსხვავებით, მან ზომიერი რესპუბლიკელი ამომრჩევლების მოსაზიდად ქრისტიანული რწმენა და ეკონომიკური პოპულიზმი გააერთიანა.
ცნობისთვის, ტეხასის შტატს აშშ-ის სენატში დემოკრატიული პარტიის წარმომადგენელი 1988 წლის შემდეგ აღარ ჰყოლია.
BM.GE
წყარო: bm.ge