2 წელი გავიდა, რაც ანაკლიაზე საინვესტიციო შეთანხმება "რამდენიმე დღეში" უნდა გაფორმებულიყო
დღეს, 2026 წლის 29 მაისს, ზუსტად ორი წელი გავიდა, რაც საქართველოს მთავრობამ ანაკლიის ღრმაწყლოვანი პორტის ინვესტორის შესარჩევ საერთაშორისო კონკურსში უპირატეს მონაწილედ ჩინური კონსორციუმი CCCC გამოავლინა.
მაშინ ეკონომიკის მინისტრმა, ლევან დავითაშვილმა განაცხადა, რომ კომპანიასთან წინადადების დაზუსტება და საინვესტიციო შეთანხმების დაზუსტება "რამდენიმე დღეში" მოხდებოდა. თუმცა უკვე 730 დღე, ანუ სრული ორი წელი გავიდა ისე, რომ ამ საკითხთან დაკავშირებით ხელშესახები სიახლე მთავრობის მიერ არ გაჟღერებულა. 25 მაისს კი პრემიერ-მინისტრმა ირაკლი კობახიძემ BMG-ის კითხვაზე პასუხისას განაცხადა, რომ მოლაპარაკებები, შესაძლოა, 2026 წლის ბოლომდე გაგრძელდეს.
"ჩინურ-სინგაპურულ კონსორციუმთან მოლაპარაკებები მიმდინარეობს. ამ ეტაპზე არ იგეგმება რაიმე ახალი კონკურსის გამოცხადება. გამომდინარე იქიდან რომ პროექტის განხორციელება ისედაც გრძელდება, ჩვენ გვაქვს გარკვეულ ეტაპამდე იმის საშუალება, რომ ხელოვნურად არ დავაჩქაროთ პროცესები, თუმცა გარკვეულ ეტაპზე გადაწყვეტილება უნდა იყოს მიღებული. მე ვფიქრობ, რომ წლის ბოლოს არ უნდა გადასცდეს ეს ყველაფერი და ძალიან მალევე უახლოეს თვეებში უნდა იყოს გადაწყვეტილება მიღებული, თანამშრომლობის გაგრძელების კონკრეტულ მოდელთან დაკავშირებით.
2029 წლისთვის პროექტის პირველი ფაზის დასრულება არის აბსოლუტურად რეალური და პარალელურად ვმუშაობთ გზაზე, რკინიგზაზე და სათანადო ვადებში ყველაფერი იქნება განხორციელებულ", - განაცხადა ირაკლი კობახიძემ BMG-ის კითხვაზე პასუხისას.
თუმცა 2025 წელს კობახიძე აცხადებდა, რომ CCCC-თან ექვსი ძირითადი საკითხი იყო, რაც დაზუსტებას საჭიროებდა. უცნობია თუ რამდენი პრობლემური საკითხი რჩება კომპანიას და კონკურსის შედეგად დასახელებულ უპირატეს მონაწილეს შორის. როგორც მთავრობა მიუთითებს, სახელმწიფო პროექტში არ იქნება ინვესტორისთვის ტვირთების ან კრედიტის გარანტორი, შესაბამისად თუკი ერთ-ერთი პრობლემური საკითხი სწორედ ტვირთების ან სესხის გარანტირებას შეეხება, ამ შემთხვევაში სავარაუდოდ მთავრობა უარყოფით პასუხს დააფიქსირებს, რადგან 2020 წლის იანვარში "ანაკლიის განვითარების კონსორციუმთან" საინვესტიციო შეთანხმების მოშლის ოფიციალური მიზეზი სწორედ რამდენიმე საერთაშორისო საფინანსო ინსტიტუტის მიერ გასაცემი სესხის მთავრობის მიერ გარანტირება იყო.