2026 წლის მსოფლიო ჩემპიონატის ტრანსლაცია შესაძლოა, საზოგადოებრივი მაუწყებელმა აღარ განახორციელოს
საზოგადოებრივმა მაუწყებელმა შესაძლოა 2026 წლის მსოფლიო საფეხბურთო ჩემპიონატის ტრანსლაცია აღარ განახორციელოს. აღნიშნული ინფორმაცია მაუწყებლის სამეურვეო საბჭოს სხდომაზე გაჟღერდა.
საგულისხმოა, რომ ტრადიციულად, ქართველი გულშემატკივარი მსოფლიო ჩემპიონატის მატჩებს პირველი არხის პირდაპირ ეთერში ადევნებდა თვალს, თუმცა, როგორც საბჭოს სხდომაზე გახდა ცნობილი, ამჯერად ვითარება შესაძლოა შეიცვალოს. საბჭოს წევრთა განმარტებით, ერთ-ერთი მთავარი მიზეზი მნიშვნელოვნად გაზრდილი საფასურია, რომელიც ტრანსლაციის უფლებებისთვის საერთაშორისო საფეხბურთო ორგანიზაციისგან არის მოთხოვნილი.
მათივე თქმით, საკითხი მხოლოდ ფინანსურ ნაწილს არ ეხება - საბჭოზე აქტიურად განიხილებოდა, რამდენად მნიშვნელოვანია მსგავსი მასშტაბის სპორტული ღონისძიებების საზოგადოებრივი მაუწყებლის ეთერში შენარჩუნება. საბჭოს წევრთა ნაწილი აღნიშნავს, რომ ისტორიულად პირველი არხი სწორედ იმ პლატფორმას წარმოადგენდა, რომელიც საზოგადოებას უფასოდ სთავაზობდა უმნიშვნელოვანეს სპორტულ ტურნირებს, მათ შორის მსოფლიო ჩემპიონატს, რაც მაყურებლისთვის განსაკუთრებული მნიშვნელობის მატარებელია.
სხდომაზე ასევე დაისვა კითხვები მაუწყებლის სტრატეგიასთან დაკავშირებით. მათ შორის, რამდენად სწორია მსგავსი კონტენტის დაკარგვა და როგორ აისახება ეს მაყურებლის ინტერესებზე.
BM.GE
წყარო: bm.ge