2026 წლის პირველ კვარტალში საქართველოს რკინიგზის ტვირთბრუნვა შემცირდა

2026 წლის პირველ კვარტალში საქართველოს რკინიგზით 3.0 მილიონი ტონა ტვირთი გადაიტანეს, რაც გასული წლის შესაბამის პერიოდთან შედარებით 0.03%-ით ნაკლებია. მონაცემებს საქართველოს სტატისტიკის ეროვნული სამსახური აქვეყნებს.

საქსტატის ინფორმაციით, გადაზიდული ტვირთის 56.7% ტრანზიტზე მოდიოდა, 34.7% - საერთაშორისო გადაზიდვებზე (ტრანზიტის გარეშე), ხოლო 8.6% - ადგილობრივ გადაზიდვებზე.

საერთაშორისო გადაზიდვების ფარგლებში, რკინიგზით გადატანილი ტვირთის 75% საქართველოში შემოტანილ ტვირთზე მოდიოდა, ხოლო 25% - ქვეყნიდან გატანილზე.

ანგარიშის მიხედვით, 2026 წლის პირველ კვარტალში რკინიგზით შემოტანილი ტვირთის 40.6%-ის გამომგზავნი ქვეყანა რუსეთის ფედერაცია იყო, 20.8%-ის - აზერბაიჯანი, ხოლო დანარჩენი ქვეყნების წილი ჯამურად 38.7%-ს შეადგენდა. ექსპორტის მიმართულებით, ყველაზე დიდი წილი ყაზახეთზე (9.8%), სომხეთზე (8.9%) და რუსეთის ფედერაციაზე (8.6%) მოდიოდა.

ტრანზიტული ტვირთების დანიშნულების ქვეყნებს შორის პირველ ადგილზე ჩინეთი იყო 7.6%-ით, შემდეგ მოდიოდნენ თურქეთი - 7.5%, ნიდერლანდები - 4.4%, უკრაინა - 2.8%, იტალია - 1.4% და რუმინეთი - 1.0%. ამავე პერიოდში, ტრანზიტული ტვირთის 5.3%-ის გამომგზავნი ქვეყანა ბრაზილია იყო, 3%-ის - თურქეთი.

საქსტატის მონაცემებით, გადაზიდული ტვირთის ყველაზე დიდი ნაწილი 33.4% ნავთობპროდუქტებზე მოდიოდა. კიდევ 23.9% ქიმიკატების, ქიმიური პროდუქტებისა და ხელოვნური ბოჭკოების ჯგუფს ეკავა, ხოლო 12.3% ლითონის მადანსა და სხვა სამთო და კარიერულ პროდუქტებს.

რაც შეეხება მგზავრთა რაოდენობას, 2026 წლის პირველ კვარტალში საქართველოს რკინიგზამ 301.8 ათასი მგზავრი გადაიყვანა, რაც წლიურად 13.5%-ით შემცირებული მაჩვენებელია.