45-მილიონიანი ტენდერის შეწყვეტის შემდეგ, სამინისტრომ სასკოლო ფორმებზე ბაზრის კვლევა მეორედ გამოაცხადა
განათლების სამინისტრომ 1 801 000 ერთეული სასკოლო ფორმის შესყიდვის ფასთა გამოკვლევისთვის ბაზრის კვლევა მეორედ გამოაცხადა. კვლევის დასრულების დროდ კი 25 მაისია მითითებული.
შესაბამისი პირობები ბაზრის კვლევის დოკუმენტშია გაწერილი, რომლის მიხედვითაც მიმწოდებელმა უნდა უზრუნველყოს როგორც ფორმების წარმოება, ისე მათი ტრანსპორტირება და მითითებულ მისამართებზე დასაწყობება საკუთარი ხარჯით.
საქმე ის არის, რომ იქამდე უწყება 2026-2027 სასწავლო წლისთვის დაწყებითი საფეხურის მოსწავლეებისთვის დაახლოებით 1.8 მილიონი სასკოლო ფორმის შეძენას გეგმავდა, რომლის სავარაუდო ღირებულება 44.9 მილიონ ლარს შეადგენდა. თუმცა ტენდერი 14 მაისს შეწყდა.
ახლად გამოცხადებული კვლევა მოიცავს, გოგოსა და ბიჭის პიჯაკებს, შარვლებსა და ქვედაკაბებს სხვადასხვა ასაკობრივი კატეგორიისთვის. ფორმების მიწოდება სამ ეტაპად განხორციელდება.
პირველ ეტაპზე, 25 აგვისტომდე, გათვალისწინებულია 301 000 ერთეულის მიწოდება. მეორე ეტაპზე 15 ოქტომბრამდე დამატებით 600 000 ერთეული, ხოლო მესამე ეტაპზე, 30 ნოემბრამდე, კიდევ 900 000 სასკოლო ფორმა უნდა მიეწოდოს შემსყიდველს. ზუსტად იგივე მოთხოვნები იყო გაწერილი პირველ კველვაში.
დოკუმენტის მიხედვით, საქონლის მიწოდების ადგილი თბილისია, თუმცა ფორმები შემსყიდველის მიერ მითითებულ კონკრეტულ მისამართებზე უნდა გადანაწილდეს.
ტექნიკური მოთხოვნების მიხედვით, თითოეულ პროდუქტს უნდა ჰქონდეს იარლიყი, სადაც მითითებული იქნება ქსოვილის შემადგენლობა, მოხმარებისა და რეცხვის პირობები, ასევე ზომა. თითოეული ფორმა ინდივიდუალურად უნდა შეიფუთოს, ხოლო მეორეულ შეფუთვაზე დატანილი უნდა იყოს ბარკოდი, რომლის მეშვეობითაც შესაძლებელი იქნება პროდუქციის იდენტიფიცირება რეგიონების, ზომებისა და კატეგორიების მიხედვით.
მიმწოდებელი ვალდებული იქნება, ხელშეკრულების გაფორმების შემდეგ შემსყიდველთან შეათანხმოს ფორმების ფერი, თარგი და ბრენდირება, მათ შორის ლოგოები, წარწერები და სხვა ვიზუალური დეტალები, რის შემდეგაც დაიწყებს წარმოებას.