ADB-თან ხელს მოვაწერთ $1 მლრდ პროექტების დაფინანსებას, რომელიც მოიცავს საგზაო და სარკინიგზო ინფრასტრუქტურას - ხუციშვილი

ფინანსთა მინისტრი ლაშა ხუციშვილი აცხადებს, რომ წელს, აზიის განვითარების ბანკთან (ADB) არსებული სამოქმედო გეგმის ფარგლებში, 1 მილიარდი დოლარის ღირებულების პროექტების დაფინანსებაზე ხელმოწერა იგეგმება.

„აზიის განვითარების ბანკთან მიმდინარეობს მუშაობა და წელს არსებული სამოქმედო გეგმის ფარგლებში, ვგეგმავთ ხელი მოვაწეროთ ერთი მილიარდი დოლარის ოდენობის პროექტების დაფინანსებას, რომელსაც სრულად განახორციელებს აზიის განვითარების ბანკი და რომელიც მოიცავს, როგორც საგზაო, ისე სარკინიგზო ინფრასტრუქტურას“, - განაცხადა ხუციშვილმა.

მინისტრმა ბანკის წლიური შეხვედრის ფარგლებში გამართულ შეხვედრებზეც ისაუბრა, რომლებიც ADB-ის პრეზიდენტთან და ხელმძღვანელ პირებთან შედგა. ხუციშვილის თქმით, მხარეებმა მიმოიხილეს საქართველოში არსებული ეკონომიკური მდგომარეობა, მაღალი ეკონომიკური ზრდის შედეგები და ის პროექტები, რომლებსაც ADB საქართველოში ახორციელებს.

„ამ მიმართულებით, აზიის განვითარების ბანკი ერთ-ერთი მოწინავეა საფინანსო ინსტიტუტებს შორის, რომელსაც ქვეყანაში განხორციელებული აქვს 6 მილიარდამდე ინვესტიცია და მიმდინარე, არსებული პროექტების ღირებულება 2 მილიარდ დოლარს აჭარბებს. ბანკის პრეზიდენტის მხრიდან ხაზი გაესვა საქართველოს ცენტრალურ როლს შუა დერეფნის განვითარების მიმართულებით და დადასტურდა მხარდაჭერა ბანკის მხრიდან ინვესტიციების განხორციელების კუთხით იმისათვის, რომ საქართველოს როლი კიდევ უფრო გამოიკვეთოს და მათ შორის, განხორციელდეს მნიშვნელოვანი ინვესტიციები ინფრასტრუქტურის მიმართულებით“, - განაცხადა ხუციშვილმა.

2026 წლის აპრილში გამოქვეყნებული ანგარიშის მიხედვით, ADB-მ საქართველოსთვის როგორც სახელმწიფო, ასევე კერძო სექტორისთვის საერთო ჯამში 1 მილიარდი დოლარის სესხები დაამტკიცა. განვითარების ბანკის მიერ სახელმწიფო სექტორისთვის გამოყოფილი კრედიტების მოცულობა 707 მლნ დოლარია, დანარჩენი დაფინანსება კი კერძო სექტორისკენ არის მიმართული.