ადგილობრივი ექსპორტი რეკორდულ $1.5-მილიარდიან ნიშნულზეა - რამ განაპირობა ზრდა?

4 თვეში ადგილობრივი ექსპორტი რეკორდულ ნიშნულამდე გაიზარდა. იანვარ-აპრილში საქართველომ ადგილობრივი საქონლის ექსპორტით 1 მილიარდ 551 მილიონი დოლარის შემოსავალი მიიღო, რაც წლიურად 73.5%-ით გაზრდილი მაჩვენებელია.

ოფიციალური სტატისტიკის მიხედვით, ადგილობრივი ექსპორტით მიღებული შემოსავალი 4 თვის ჭრილში 2022 წელს გვქონდა და $1.2 მილიარდს შეადგენდა.

წელს, პირველ 4 თვეში მთლიან ექსპორტში ადგილობრივი ექსპორტის წილი 63.6%-მდე გაიზარდა, რაც ამ პერიოდისთვის ისტორიული მაქსიმუმია. საქართველოს მთლიანი ექსპორტი 4 თვეში წლიურად 21.1%-ით 2 მილიარდ 440 მილიონ დოლარამდეა გაზრდილი.

ადგილობრივი ექსპორტის ზრდა დიდწილად საქართველოში ნავთობისა და ნავთობპროდუქტების გადამუშავების დაწყებითა და ექსპორტით არის განპირობებული. 4 თვეში ამ პროდუქტს ადგილობრივ ექსპორტის მეხუთედი უკავია და გასულ წელთან შედარებით რეკორდულად არის გაზრდილი. TOP-10 უმსხვილესი საექსპორტო საქონლის ჩამონათვალიდან ყველა პროდუქტის გადაზიდვები გაზრდილია, კლება გვაქვს სპირტიანი სასმელების გაყიდვებში.

იანვარ-აპრილში ათი უმსხვილესი ქვეყნის წილმა საქართველოს მთლიან ადგილობრივ ექსპორტში 69% შეადგინა. ამ მხრივ, უმსხვილესი საექსპორტო პარტნიორი ჩინეთია, სადაც წელს სპილენძისა და ძვირფასი ლითონის მადნების ექსპორტი მნიშვნელოვნად გააქტიურდა.