"აღარ ვართ ფასის დამდგენი" - როგორ მუშაობს სანქცირებული "ლუკოილი" საქართველოში?

სანქცირებული Lukoil-ის ქართული შვილობილი "ლუკოილ ჯორჯია" საწვავის იმპორტს ვეღარ ახორციელებს, თუმცა მუშაობას კოლეგებისგან, ადგილობრივად ნაყიდი საწვავით აგრძელებს. ამის შესახებ "ლუკოილ ჯორჯიას" დირექტორის მოადგილემ ლევან ახვლედიანმა ფასების საპარლამენტო კომისიაზე განაცხადა.

მისი თქმით, კომპანიას 57 ბენზინგასამართი სადგური აქვს.

"ამ ეტაპზე კომპანია სანქციების ქვეშაა, 2025 წლის ოქტომბრიდან მოყოლებული, ამიტომ პრაქტიკულად იმპორტს აღარ ვაწარმოებთ, ნულია ჩვენი იმპორტის წილი ბაზარზე, თუმცა 25% იყო სანქციებამდე. ფასწარმოება ზუსტად იგივეა, რაც კოლეგებმა თქვეს.

როცა იმპორტით ვიყავით დაკავებული, პლაცით ვმოქმედებდით, საწვავი ძირითადად ბულგარეთიდან შემოგვქონდა, სადაც ლუკოილს თავისი ქარხანა ჰქონდა. ამ ეტაპზე უბრალოდ ვყიდულობთ ადგილობრივ ბაზარზე, რადგან იმპორტი შეზღუდული გვაქვს. სანქციების მიუხედავად, კომპანიას აქვს ლიცენზია OFAC-ისგან [აშშ-ის სახაზინო დეპარტამენტის უცხოური აქტივების კონტროლის ოფისი] და ბრიტანეთის შესაბამისი უწყებისგან, რომ იფუნქციონიროს ადგილობრივ ბაზარზე, თუმცა საწვავის შესყიდვას ჩვენი კოლეგებისგან ვაწარმოებთ. შესაბამისად, აღარ ვართ ფასის დამდგენი ორგანიზაცია, დინებას მივყვებით",- აღნიშნა მან.

ცნობისთვის, გასული წლის 22 ოქტომბერს ამერიკის შეერთებულმა შტატებმა რუსულ ნავთობკომპანია „ლუკოილს“ ფინანსური სანქციები დაუწესა.

სანქციების გამოცხადების დროს, აშშ-ის ხაზინამ დოკუმენტს დაურთო სპეციალური დანართი, სადაც განისაზღვრა, რომ 2025 წლის 21 ნოემბრამდე შეზღუდვები არ გავრცელდებოდა რუსეთს გარეთ მდებარე „ლუკოილის“ ბენზინგასამართ სადგურებზე, თუმცა მოგვიანებით, OFAC-მა ეს ვადა რამდენჯერმე გაახანგრძლივა.