ახალი ბაზა ტურიზმის სექტორისთვის და ₾6 000-მდე გაზრდილი ჯარიმები - პარლამენტმა კანონი დაჩქარებულად მიიღო

პარლამენტმა დაჩქარებული წესით, III მოსმენით ერთხმად დაუჭირა მხარი „ტურიზმის შესახებ“ კანონში შესატანი ცვლილებების პაკეტს, რომლის თანახმადაც ტურისტულ გიდებს, ტუროპერატორებსა და ტურისტულ სააგენტოებს ეკონომიკური რეესტრის ნაცვლად, სპეციალურ „ტურისტული საქმიანობების სუბიექტების ბაზაში“ რეგისტრაცია დაევალებათ.

ცვლილებების ძირითადი ნაწილი ძალაში 2026 წლის 1-ელი ივნისიდან შევა, ხოლო ახალი სანქციების ამოქმედება 2027 წლიდან იგეგმება.

კანონპროექტის მიხედვით, მოქმედი რედაქციიდან სრულად არის ამოღებული ის მუხლები, რომლებიც ტურისტული საქმიანობის სუბიექტებს ეკონომიკურ რეესტრში რეგისტრაციას ავალდებულებდა. შესაბამისად, დაკორექტირდა სუბიექტების (ტურისტული გიდი, ტუროპერატორი, ტურაგენტი) სტატუსი და განისაზღვრა მათი ახალი ვალდებულება:

• ახალი ბაზა: მონაცემთა აღრიცხვის მიზნით, სუბიექტები ვალდებულნი იქნებიან დარეგისტრირდნენ ტურიზმის ეროვნული ადმინისტრაციის „ტურისტული საქმიანობების სუბიექტების ბაზაში“. • ტერმინოლოგიური ცვლილება: მოქმედი კანონიდან ამოიღეს ტერმინები — „ალპური გამყოლი“, „სათხილამურო გამყოლი“, „სამთო გამყოლი“ და მათთან დაკავშირებული შესაბამისი მუხლები.

ახალი კანონმდებლობით, საქართველოს მთავრობა განსაზღვრავს რისკის შემცველი ტურისტული საქმიანობების ნუსხასა და მათი განხორციელების წესს.

• დაზღვევის ვალდებულება: მთავრობა დაადგენს იმ რისკის შემცველ საქმიანობებს, რომელთა მიმწოდებლებსაც პროფესიული ან სამოქალაქო პასუხისმგებლობის დაზღვევის პოლისის ფლობა დაევალებათ. • სერტიფიცირება და ნებართვები: რისკის შემცველი ტურისტული საქმიანობის პერსონალის სერტიფიცირებას ტურიზმის ეროვნული ადმინისტრაცია მოახდენს. ცალკეულ შემთხვევებში, მომსახურების მიწოდების უფლებას გასცემს თავად ადმინისტრაცია ან მთავრობის დადგენილებით განსაზღვრული სუბიექტი.

საქართველოს მთავრობამ 2026 წლის 1 ივნისამდე უნდა დაამტკიცოს რისკის შემცველი ტურისტული მომსახურებების ნუსხა, საქმიანობის წესი, ტექნიკური რეგლამენტი და პერსონალის სერტიფიცირების პირობები.