Amazon-ის შემოსავალმა მოლოდინებს გადააჭარბა

Amazon-მა მიმდინარე წლის პირველი კვარტალის ფინანსური ანგარიში გამოაქვეყნა, რომლის მაჩვენებლებმაც უოლ-სტრიტის მოლოდინებს გადააჭარბა. კომპანიის შემოსავალმა $181.5 მილიარდი შეადგინა, რაც ანალიტიკოსების მიერ პროგნოზირებულ $177.3 მილიარდს აღემატება. ერთ აქციაზე მოგება $2.78-მდე გაიზარდა, მაშინ როცა ბაზარი მხოლოდ $1.64-ს ელოდა.

ბოლო კვარტალში კომპანიის ზრდის მთავარი მამოძრავებელი ძალა Cloud-სერვისების მიმართულება გახდა. Amazon Web Services-ის შემოსავალი წლიურად 28%-ით გაიზარდა და $37.6 მილიარდს მიაღწია. მნიშვნელოვანი პროგრესი აჩვენა სარეკლამო ბიზნესმაც, სადაც მაჩვენებელი $17.24 მილიარდამდე გაიზარდა. აღსანიშნავია, რომ ეს შედეგი ანალიტიკოსების მიერ ნავარაუდებ 21.2%-იან ზრდას საგრძნობლად აჭარბებს.

პარალელურად ამისა, ხელოვნური ინტელექტის განვითარებისთვის Amazon-მა კაპიტალური დანახარჯები მნიშვნელოვნად გაზარდა. პირველ კვარტალში აღნიშნულმა ხარჯებმა $44.2 მილიარდი შეადგინა. კომპანია 2026 წელს ინვესტიციების $200 მილიარდამდე გაზრდას გეგმავს. გარდა ამისა, ტექნოლოგიურმა გიგანტმა OpenAI-სთან, Anthropic-თან და Meta-სთან სტრატეგიული შეთანხმებები გააფორმა.

გარდა ამისა, კომპანია კოსმოსური ინტერნეტის სერვისის, Leo-ს გაშვებასაც აქტიურად ამზადებს. პროექტის კომერციული ექსპლუატაცია მიმდინარე წლის მესამე კვარტალში დაიწყება. ამ მიზნით Amazon-მა $11.57 მილიარდად Globalstar-ი შეიძინა. როგორც ირკვევა, აღნიშნული გარიგება Apple-თან თანამშრომლობის გაღრმავების შესაძლებლობასაც იძლევა.

მეორე კვარტალში Amazon-ი $194-დან $199 მილიარდამდე შემოსავლის მიღებას პროგნოზირებს. საოპერაციო მოგება კი სავარაუდოდ $20-დან $24 მილიარდამდე იქნება. ამასთან, კომპანიის თანამშრომელთა რაოდენობა მცირედით შემცირდა. სიცხადისთვის უნდა ითქვას, რომ წლის დასაწყისში ტექნოლოგიურმა გიგანტმა 16,000 კორპორაციული თანამშრომლის დათხოვნა დააანონსა.