AMD ტაივანის AI სექტორში $10 მილიარდის ინვესტირებას გეგმავს

ამერიკულმა ჩიპების მწარმოებელმა გიგანტმა Advanced Micro Devices-მა განაცხადა, რომ ტაივანის ხელოვნური ინტელექტის სექტორში $10 მილიარდზე მეტის ინვესტიციას განახორციელებს.

როგორც ირკვევა, კომპანიის მიზანი სტრატეგიული პარტნიორობის გაღრმავება და ხელოვნური ინტელექტის მოწინავე ჩიპების წარმოებისა და აწყობის სიმძლავრეების გაზრდაა.

არსებული ინფორმაციით, ამერიკული კომპანია თანამშრომლობას ტაივანურ ჩიპების შეფუთვისა და ტესტირების პროვაიდერ ASE-სთან და მის შვილობილ კომპანია SPIL-თან დაიწყებს. ისინი ხელოვნური ინტელექტის სისტემებისა და პროცესორებისთვის უფრო ენერგოეფექტურ ტექნოლოგიას ერთობლივად შეიმუშავებენ. როგორც ირკვევა, ეს ტექნოლოგია გათვლილი იქნება AMD-ს Venice-ის ცენტრალურ პროცესორებსებზე. საუბარია 2-ნანომეტრიან CPU-ებზე, რომლებსაც ტაივანური გიგანტი, TSMC ქმნის. პარალელურად, AMD სხვა ადგილობრივ პარტნიორებთან, მათ შორის PTI-სთან, Sanmina-სთან, Wiwynn-თან, Wistron-სა და Inventec-თანაც აპირებს თანამშრომლობის დაწყებას.

ცნობისთვის, ტაივანი წამყვან როლს ასრულებს ხელოვნური ინტელექტის გლობალურ მიწოდების ჯაჭვში. ის კრიტიკულად მნიშვნელოვანი პარტნიორია ისეთი ტექნოლოგიური გიგანტებისთვის, როგორებიც არიან Apple-ი და Nvidia.