ამერიკამ რუსულ ნავთობზე სანქციების შემსუბუქების რეჟიმი გაახანგრძლივა
აშშ-ის ფინანსთა მინისტრმა, სკოტ ბესენტმა რუსული საზღვაო ნავთობის შესყიდვაზე სანქციების გამონაკლისის რეჟიმი კიდევ 30 დღით გაახანგრძლივა, რაც ირანის ომით დაზარალებული, ენერგეტიკულად მოწყვლადი ქვეყნების დახმარებას მიზნად ისახავს.
აღსანიშნავია, რომ უწყება მანამდე ამ შეღავათის გაუქმებას გეგმავდა. თუმცა, როგორც ირკვევა, ფედერალურმა ხაზინამ 30-დღიანი გენერალური ლიცენზია მას შემდეგ გამოსცა, რაც წინა გამონაკლისის ვადა შაბათს ამოიწურა. სკოტ ბესენტის განმარტებით, ეს გადაწყვეტილება ტანკერებში ჩატვირთულ რუსულ ნავთობსა და ნავთობპროდუქტებზე დროებით წვდომას უზრუნველყოფს, რაც რუსული ნავთობკომპანიების წინააღმდეგ დაწესებულ მკაცრ ამერიკულ სანქციებს არ არღვევს.
რაც შეეხება მიზეზებს, Reuters-ის ინფორმაციით, ლიცენზიის მეორედ გაგრძელება იმ ქვეყნებმა მოითხოვეს, რომლებიც აშშ-ისრაელისა და ირანის სამხედრო კონფლიქტისა და ჰორმუზის სრუტის ჩაკეტვის გამო, სპარსეთის ყურის ნავთობის მიწოდების გარეშე დარჩნენ.
ცნობისთვის, დონალდ ტრამპის ადმინისტრაციამ რუსულ ნავთობგიგანტებს, Rosneft-სა და Lukoil-ს სანქციები გასულ წელს დაუწესა, რაც მოსკოვისთვის სასიცოცხლოდ მნიშვნელოვანი ნავთობის შემოსავლების შეზღუდვას ისახავდა მიზნად. მას შემდეგ, რაც აშშ-ისრაელისა და ირანის სამხედრო დაპირისპირებამ გლობალურად ნავთობის ფასების მკვეთრი ზრდა გამოიწვია, ფინანსთა სამინისტრომ პირველი დროებითი ლიცენზია მარტში გამოსცა, რაც მიწოდების დეფიციტის აღმოფხვრასა და ფასების ზრდის შეჩერებას ემსახურებოდა.