ამერიკულმა Pfizer-მა და ჩინურ Innovent-თან $10.5-მილიარდიანი შეთანხმება გააფორმა

ამერიკულმა ფარმაცევტულმა გიგანტმა Pfizer-მა და ჩინურმა კომპანიამ Innovent Biologics-მა სიმსივნის სამკურნალო მედიკამენტების შესაქმნელად შეთანხმება გააფორმეს. როგორც ირკვევა, ახალი პარტნიორობა მიზნად 12 ინოვაციური პრეპარატის ერთობლივად განვითარებას ისახავს.

ამ მასშტაბური გარიგების საერთო ღირებულება $10.5 მილიარდს აღწევს. შეთანხმების ფარგლებში Innovent-ი წინასწარი შენატანის სახით $650 მილიონს მიიღებს, ხოლო დარჩენილ $9.85 მილიარდს პროექტის სხვადასხვა ეტაპის წარმატებით დასრულების შემდეგ აიღებს.

მნიშვნელოვანია ითქვას, რომ კლინიკური კვლევების პირველ ფაზას ჩინური კომპანია უხელმძღვანელებს, შემდეგ კი გლობალური განვითარების პროცესს Pfizer-ი გადაიბარებს. უშუალოდ შეთანხმება სამი ძირითადი ნაწილისგან შედგება. ოთხი პრეპარატის კომერციალიზაციას მხარეები ევროპასა და შეერთებულ შტატებში ერთობლივად განახორციელებენ, თუმცა ჩინეთის ბაზარზე ექსკლუზიურ უფლებებს Innovent-ი შეინარჩუნებს. ამასთან, დარჩენილი რვა პროგრამიდან ოთხზე Pfizer-ი გლობალურ ლიცენზიას მიიღებს და კვლევების ყველა ხარჯს თავად დაფარავს.

ცნობისთვის, ბოლო წლებში გლობალური ფარმაცევტული კომპანიები ჩინურ ბიოტექნოლოგიურ სექტორში ინვესტიციებს აქტიურად ზრდიან. გასულ წელს მსგავსი გარიგებების ჯამურმა ღირებულებამ უპრეცედენტო ნიშნულს, $137.7 მილიარდს მიაღწია. აღსანიშნი ფაქტია, რომ ამერიკულმა Pfizer-მა გასული წლის მაისში ონკოლოგიური პრეპარატების მიმართულებით მსგავსი კონტრაქტი კიდევ ერთ ჩინურ კომპანიასთან, 3SBio-სთან გააფორმა.