ანაკლია, კოჯორი და საჩხერე - სად და როდის გაიმართება წელს ახალგაზრდული და ჯარის ბანაკები

„ახალგაზრდული ღონისძიებების ხელშეწყობის პროგრამის“ ფარგლებში, 2026 წლის ივნის-სექტემბერში ზუგდიდის მუნიციპალიტეტის სოფელ ანაკლიაში „ახალგაზრდული ბანაკი“ ჩატარდება, ხოლო დაბა კოჯორსა და ქალაქ საჩხერეში, თავდაცვის სამინისტროსთან თანამშრომლობით, „ჯარის ბანაკი“ მოეწყობა. მთავრობამ განათლების, მეცნიერებისა და ახალგაზრდობის სამინისტროს შესაბამისი წინადადება უკვე მიიღო და უწყებებს კონკრეტული დავალებები განუსაზღვრა. ირაკლი კობახიძის მიერ ხელმოწერილი შესაბამისი განკარგულება მიმდინარე წლის 21 მაისით თარიღდება.

ბანაკების სათანადო დონეზე ჩატარების მიზნით, პროცესში რამდენიმე სამინისტრო და ადგილობრივი თვითმმართველობა ერთობლივად ჩაერთვება:

• ჯანდაცვის სამინისტრო უზრუნველყოფს ანაკლიის ბანაკს კვალიფიციური ექიმითა და ექთნით, საჭიროების შემთხვევაში მონაწილეებს სასწრაფო დახმარების ბრიგადით საავადმყოფოში გადაყვანსა და მკურნალობის ხარჯებს აუნაზღაურებს. გარდა ამისა, უწყებამ „ჯარის ბანაკში“ მონაწილეობისთვის უნდა წარადგინოს 14-17 წლის არაუმეტეს 40 მოსწავლის სია მზრუნველობამოკლებულ ბავშვთა რეინტეგრაციის, მინდობით აღზრდისა და მცირე საოჯახო ტიპის სახლების ქვეპროგრამებიდან. • შინაგან საქმეთა სამინისტრო პასუხისმგებელი იქნება მონაწილეთა უსაფრთხო ტრანსპორტირებაზე მთელი მარშრუტის განმავლობაში. საგანგებო სიტუაციების მართვის სამსახური კი ბანაკის ტერიტორიაზე სახანძრო უსაფრთხოებასა და წყალზე ადამიანთა სიცოცხლის დაცვას 24-საათიან რეჟიმში გააკონტროლებს. • თავდაცვის სამინისტრო ერთი საბანაკე დღის ფარგლებში დაგეგმავს და განახორციელებს პროგრამულ აქტივობებს თავდაცვის ძალების, სამოქალაქო თავდაცვისა და ეროვნული უსაფრთხოების შესახებ. ასევე, „ჯარის ბანაკისთვის“ შეარჩევს სამინისტროს სისტემის თანამშრომელთა შვილებს (14-17 წლის არაუმეტეს 100 მოსწავლეს). • ახალგაზრდობის სააგენტო უზრუნველყოფს ანაკლიის ბანაკის მონაწილეთა უფასო კვებას, ტრანსპორტირებას, რეკრეაციულ, საგანმანათლებლო და სპორტულ აქტივობებს. სააგენტო ასევე დააფინანსებს „ჯარის ბანაკის“ მონაწილეთა მგზავრობას და ბანაკში ჩართული უწყებების წარმომადგენლების საცხოვრებელსა და კვებას. • რეგიონული განვითარებისა და ინფრასტრუქტურის სამინისტრო, გაერთიანებული წყალმომარაგების კომპანიის მეშვეობით, პასუხისმგებელი იქნება ანაკლიის ბანაკში სასმელი წყლის უწყვეტ მიწოდებაზე, ხარისხის კონტროლსა და სისტემის გამართულ მუშაობაზე.