Apple-მა ჩიპების წარმოების მიზნით Intel-თან და Samsung-თან მოლაპარაკებები გამართა

ამერიკულმა ტექნოლოგიურმა გიგანტმა, Apple-მა მოწყობილობებისთვის მთავარი პროცესორების წარმოების მიზნით Intel-თან და Samsung Electronics-თან წინასწარი მოლაპარაკებები გამართა.

Bloomberg News-ის ინფორმაციით, ტექნოლოგიური გიგანტის ხელმძღვანელები ტეხასში Samsung-ის მშენებარე ქარხანასაც ეწვივნენ. პარალელურად, კომპანიამ Intel-ის ჩიპების წარმოების სერვისებით სარგებლობის შესაძლებლობაზეც აქტიურად დაიწყო ფიქრი. აღსანიშნავია, რომ ამ ეტაპზე მხარეებს შორის კონკრეტული შეკვეთები არ გაფორმებულა და პროცესი მხოლოდ საწყის ფაზაშია.

როგორც ირკვევა, კომპანიის ეს ნაბიჯი მიზნად ტაივანური ნახევარგამტარების გიგანტის, TSMC-ის მიმართ არსებული დამოკიდებულების შემცირებასა და ალტერნატიული წყაროების მოძიებას ისახავს. თუმცა, როგორც Bloomberg-ი წერს, Apple-ი TSMC-ის ტექნოლოგიების ჩანაცვლებასთან დაკავშირებით გარკვეულ რისკებს მაინც ხედავს. როგორც ირკვევა, მენეჯმენტისთვის პრიორიტეტული საკითხები წარმოების საიმედოობა და მასშტაბების შენარჩუნებაა - ამ მხრივ კი ტაივანური გიგანტი ჯერჯერობით უკონკურენტოდ მიიჩნევა.

აღსანიშნავია, რომ ჩიპების მიწოდების კუთხით არსებულ პრობლემებზე Apple-მა ჯერ კიდევ გასული თვის ფინანსური ანგარიშის წარდგენისას მიანიშნა. ტიმ კუკის განცხადებით, iPhone-ის გაყიდვების მაჩვენებლებზე უარყოფითი გავლენა სწორედ თანამედროვე პროცესორების დეფიციტმა იქონია. ცნობისთვის, iPhone 17-ის სერიის ჩიპები TSMC-ის იმავე ტექნოლოგიით იწარმოება, რომელსაც წამყვანი ხელოვნური ინტელექტის ჩიპები იყენებენ.

შეხსენებისთვის, Apple-ი მრავალი წელია თანამშრომლობს ტაივანურ კომპანია TSMC-სთან, რომელიც მსოფლიოში ნახევარგამტარების უმსხვილესი მწარმოებელია.