აპრილში OPEC-ის ნავთობის მოპოვება 25-წლიან მინიმუმამდე შემცირდა - Reuters

აპრილში ნავთობის ექსპორტიორი ქვეყნების ორგანიზაცია OPEC-ის ნავთობის მოპოვება კიდევ უფრო შემცირდა და ბოლო ორ ათწლეულზე მეტი ხნის განმავლობაში ყველაზე დაბალ ნიშნულზე დავიდა. Reuters-ის კვლევის თანახმად, ეს ირანთან აშშ-ისრაელის ომმა გამოიწვია, რამაც ფაქტობრივად ჩაკეტა ჰორმუზის სრუტე და ექსპორტის შემცირება განაპირობა.

კვლევამ აჩვენა, რომ 12-წევრიანი ორგანიზაციის ნედლი ნავთობის მოპოვება აპრილში, წინა თვესთან შედარებით, 830 000 ბარელით შემცირდა და დღეში 20.04 მილიონი ბარელი შეადგინა.

OPEC+-ის (რომელიც აერთიანებს OPEC-სა და მის მოკავშირეებს, მათ შორის რუსეთს) რვა წევრი აპრილში ნავთობის მოპოვების ზრდის განახლებაზე შეთანხმდა, თუმცა 28 თებერვალს ირანის ომის დაწყებამ და ჰორმუზის ფაქტობრივმა ჩაკეტვამ ამ შეთანხმების შესრულება შეუძლებელი გახადა.

Reuters-ის კვლევის თანახმად, აპრილში მოპოვების ყველაზე დიდი ვარდნა ქუვეითში დაფიქსირდა, რაც მთელი თვის განმავლობაში ექსპორტის შეფერხებას ასახავს.

კლება ჰქონდათ საუდის არაბეთსა და ერაყსაც, ხოლო სპარსეთის ყურის ქვეყნებიდან არაბთა გაერთიანებული საამიროები ერთადერთი იყო, რომელმაც წარმოების გაზრდა შეძლო. საამიროებს ჰორმუზის გვერდის ავლით საექსპორტო მარშრუტი აქვს, ტანკერების მონაცემები კი აპრილში საამიროების ექსპორტის ზრდას აჩვენებს.

Reuters-ის კვლევების თანახმად, აპრილის მაჩვენებელი სულ მცირე 2000 წლის შემდეგ OPEC-ისთვის ყველაზე დაბალია. ის მნიშვნელოვნად ჩამორჩება 2020 წელს COVID-19-ის პანდემიის დროს დაფიქსირებულ დონესაც, როდესაც მოთხოვნა მკვეთრად დაეცა.

კვლევამ აჩვენა, რომ გარდა არაბთა გაერთიანებული საამიროებისა, რომელმაც 1-ლი მაისიდან OPEC-ი დატოვა, აპრილში მოპოვება ასევე გაზარდეს ვენესუელამ და ლიბიამ.

Reuters-ის კვლევა ეყრდნობა ფინანსური ჯგუფ LSEG-ის ნაკადების მონაცემებს, ასევე იმ კომპანიების (მაგალითად, Kpler) ინფორმაციას, რომლებიც აკვირდებიან ნაკადებს და ინფორმაციას ნავთობკომპანიების, OPEC-ისა და კონსულტანტი წყაროებიდან.