არავინ უზღუდავს ბიზნესმენს აზრის გამოთქმას, ეს ეხება [კომპანიებს] - შალვა პაპუაშვილი

"ძალიან კარგი თუ მიმართეს, მაშინ კეთილი ინებონ, კანონს დაემორჩილონ" - ასე გამოეხმაურა პარლამენტის თავმჯდომარე შალვა პაპუაშვილი "რეფორმერის" დამფუძნებლის გადაწყვეტილებას, საკონსტიტუციო სასამართლოში გაასაჩივროს კანონი, რომელიც ბიზნესს "საჯარო პოლიტიკურ აქტივობას" უკრძალავს.

დანერგილია შიში, რომ ბიზნესი უნდა იყოს ჩუმად და არაფერზე ჰქონდეს პოზიცია|"ბიზნესის დუმილის" კანონი საკონსტიტუციოში გაასაჩივრეს

შალვას პაპუაშვილმა განაცხადა, რომ საკონსტიტუციო სასამართლოსთვის მიმართვა ბიზნესის უფლებაა, თუმცა, მისი თქმით, რომ სასამართლოს საბოლოო გადაწყვეტილებამდე მხარეები მოქმედ კანონმდებლობას უნდა დაემორჩილონ.

"ძალიან კარგი, მათ უფლება აქვთ მიმართონ საკონსტიტუციო სასამართლოს და საკონსტიტუციო სასამართლო განსჯის. პარლამენტს მუდმივად აქვს საქმეები, რომელიც საკონსტიტუციო სასამართლოში მიმდინარეობს სხვადასხვა კანონებზე. ზოგჯერ ვიგებთ, ზოგჯერ ვაგებთ, ესეც ნაწილი არის პროცესისა... ძალიან კარგი თუ მიმართეს, მაშინ კეთილი ინებონ, კანონს დაემორჩილონ და იმისდა მიხედვით, რა გადაწყვეტილებას მიიღებს საკონსტიტუციო სასამართლო, ყველამ ერთად შევხედავთ და აქედან დასკვნას გამოვიტანთ," - განაცხადა პარლამენტის თავმჯდომარემ.

შალვა პაპუაშვილმა განაცხადა, რომ სადავო ნორმა არა კონკრეტულ ფიზიკურ პირებს, ბიზნესმენებს, არამედ უშუალოდ საწარმოებს ეხებათ, თუმცა არ დაუკონკრტებია, როგორ წყდება იურიდიული პირების პასუხისგებაში მიცემის საკითხი.

"არავინ უზღუდავს ბიზნესმენს პოლიტიკურ განცხადებას თუ აზრის გამოთქმას. ეს არ ეხება ინდივიდებს. ეს ეხება საწარმოებს, იურიდიულ პირებს და ეს მნიშვნელოვანი არის სწორედ, როდესაც დღეს გარე დაფინანსებით და წაქეზებით საქართველოში შუღლის დანერგვას, საზოგადოების გახლეჩას, ფაშისტური იდეოლოგიის შემოტანას ცდილობენ. რა თქმა უნდა, მნიშვნელოვანი არის, რომ ბიზნესი, ვგულისხმობ იურიდიულ პირებს, იქნება ეს - რესტორანი, კაფე, ბარი, საწარმო, მაღაზია და ასე შემდეგ - როგორც საწარმოს, მომხმარებლების მიმართ ჰქონდეს თანაბარი მოპყრობა, თანაბარი განწყობა, არ შექმნას მტრული გარემო მისი პოლიტიკური განწყობის გამო", - აღნიშნა მან.