აშშ-ის ადმინისტრაციამ, ეროვნული უსაფრთხოების საბაბით, ქარის ენერგიის პროექტები სრულად შეაჩერა
დონალდ ტრამპის ადმინისტრაციამ აშშ-ში ქარის ენერგიის განვითარების პროექტები სრულად შეაჩერა. Financial Times-ის ინფორმაციით, პენტაგონმა კერძო მიწებზე დაგეგმილი 165 პროექტი დაბლოკა და გადაწყვეტილება ეროვნული უსაფრთხოების დაცვის აუცილებლობით ახსნა. არსებული ინფორმაციით, შეზღუდვა შეეხო როგორც დასრულების ეტაპზე მყოფ ობიექტებს, ისე მოლაპარაკებების პროცესში არსებულ ინიციატივებს. აღსანიშნავია, რომ პენტაგონმა ისეთ პროექტებზეც გაავრცელა შეზღუდვა, რომლებიც მანამდე მის კონტროლს არ ექვემდებარებოდა.
როგორც ამერიკის სუფთა ენერგიის ასოციაცია აცხადებს, დეველოპერებს პრობლემები ჯერ კიდევ 2025 წლის აგვისტოდან შეექმნათ, თუმცა სრული ბლოკადა მათთვის მოულოდნელი იყო. როგორც ირკვევა, ბოლო თვეებია, კომპანიებს თავდაცვის უწყებასთან კომუნიკაციის დამყარება უჭირთ და დაგეგმილი შეხვედრები გაურკვეველი ვადით უქმდება. აპრილის დასაწყისში გაგზავნილ წერილებში პენტაგონმა ქარი ენერგიის განვითარებაზე მომუშავე კომპანიებს განუმარტა, რომ პროცესს აღნიშნული ობიექტების ეროვნულ უსაფრთხოებაზე გავლენის გასარკვევად აჩერებს.
ცნობისთვის, დონალდ ტრამპი ქარის ტურბინების მიმართ კრიტიკული დამოკიდებულებით გამოირჩევა. მისი შეფასებით, აღნიშნული დანადგარები არაესთეტიკური, ძვირად ღირებული და არაეფექტურია. პრეზიდენტი მიიჩნევს, რომ ენერგიის ალტერნატიული წყაროები ქვეყნის ეკონომიკას აზარალებს.
შეგახსენებთ, რომ აშშ-ის თავდაცვის სამინისტრო ენერგეტიკულ პროექტებს რადარებთან თავსებადობის კუთხით პერიოდულად ამოწმებს. ტრამპის ადმინისტრაციის პირობებში კი ამ პროცესმა გაცილებით მკაცრი სახე მიიღო.
