აშშ-ის ეკონომიკური ზრდის ტემპი მეორე კვარტალში 1.5%-მდე შენელდა

აშშ-ის ეკონომიკურმა ზრდამ მიმდინარე წლის მეორე კვარტალში, სეზონური და ინფლაციური ფაქტორების გათვალისწინებით, მხოლოდ 1.5% შეადგინა. არსებული ინფორმაციით, აშშ-ის ვაჭრობის დეპარტამენტის მონაცემები პროგნოზირებულზე სუსტი აღმოჩნდა. Dow Jones-ის მიერ გამოკითხული ეკონომისტები 1.8%-იან ზრდას ელოდნენ. აქვე შედარებისთვის უნდა ითქვას, რომ პირველ კვარტალში ქვეყნის მთლიანი შიდა პროდუქტი 2.1%-ით გაიზარდა.

გამოქვეყნებული ანგარიშის მიხედვით, პირადი მოხმარების ხარჯების საფასო ინდექსი ივნისში თვიურ ჭრილში 0.1%-ით შემცირდა, ხოლო წლიურმა ინფლაციამ 3.7% შეადგინა. სურსათისა და ენერგორესურსების ფასების გამოკლებით, საბაზო ინდექსი გასულ თვეში 0.1%-ით გაიზარდა, წლიურმა მაჩვენებელმა კი 3.3%-ს მიაღწია. საყურადღებოა, რომ ეს მონაცემები ანალიტიკოსების წინასწარ ვარაუდებს სრულად დაემთხვა.

მნიშვნელოვანია ითქვას, რომ აშშ-ის ფედერალური რეზერვი მონეტარული პოლიტიკის განსაზღვრისას ძირითად ორიენტირად ინფლაციის საერთო ინდექსს იყენებს.