აშშ კვანტური ჩიპების წარმოების მხარდასაჭერად $2 მილიარდის გრანტს გამოყოფს

აშშ-ის ვაჭრობის დეპარტამენტმა კვანტური გამოთვლითი ინდუსტრიის მხარდასაჭერად ჯამში $2-მილიარდიანი სუბსიდიის პაკეტი დაამტკიცა. ინიციატივის უმსხვილესი ბენეფიციარი IBM-ია, რომელიც თითქმის $1 მილიარდის დაფინანსებას მიიღებს და ამ თანხით ის მომავლის ტექნოლოგიას განავითარებს.

არსებული ინფორმაციით, IMB Anderon-ის სახელით ცნობილი ქარხანა 300-მილიმეტრიანი კვანტური ფირფიტების ქარხნის სახით იმუშავებს. ანალიტიკოსების განმარტებით, ეს პროექტი IBM-ისთვის ახალ ბიზნესმიმართულებას ხსნის, რადგან ქარხანა ქვეყანაში პირველი კომერციული ობიექტი იქნება, რომელიც მხოლოდ კვანტური წარმოებისთვის აშენდა.

ცნობისთვის, კვანტური გამოთვლების სფეროს პრეზიდენტი დონალდ ტრამპი ეროვნული უსაფრთხოებისთვის კრიტიკულად მიიჩნევს, რაც ჩინეთთან ტექნოლოგიური უპირატესობის შენარჩუნებისთვის არის აუცილებელი.

ზოგადად, კვანტურ კომპიუტერს, ქუბიტების წყალობით, წამში გაცილებით მეტი კალკულაციის განხორციელება შეუძლია, ვიდრე ტრადიციულ კომპიუტერს, რომელიც 0-ებისა და 1-ების, ანუ ბინარული სისტემით აზროვნებს. სისწრაფის მიუხედავად, ტექნოლოგია ჯერ კომერციული გამოყენებისათვის მზად არ არის, რადგან ის პროგრამულად გაუმართავია და ერთი კვანტური კომპიუტერის ღირებულება მრავალჯერ აღემატება პლანეტის ყველაზე მძლავრი სუპერკომპიუტერის ფასსაც. თუმცა, მეცნიერები ვარაუდობენ, რომ ეს ტექნოლოგია განვითარდება და მომავალში ის უფრო პრაქტიკული და ხელმისაწვდომი გახდება.