აშშ-მა და ირანმა გამართულ მოლაპარაკებებში გარკვეულ პროგრესს მიაღწიეს

აშშ-მა და ირანმა კონფლიქტის დასასრულებლად გამართულ მოლაპარაკებებში გარკვეულ პროგრესს მიაღწიეს. არსებული ინფორმაციით, მხარეები აქტიურად განიხილავენ ვაშინგტონის იმ ახალ წინადადებას, რომელმაც მათ შორის არსებული აზრთა სხვაობა საგრძნობლად შეამცირა.

საყურადღებოა, რომ დადასტურებული ინფორმაცია წარმოდგენილი 14-პუნქტიანი შეთანხმების პუნქტების შესახებ ჯერ არ არსებობს.

მნიშვნელოვანია ითქვას, რომ ვაშინგტონი და თეირანი გამდიდრებული ურანის მარაგებისა და ჰორმუზის სრუტეზე გადასახადების დაწესების საკითხებზე კვლავ ვერ თანხმდებიან. აშშ-ის სახელმწიფო მდივანმა მარკო რუბიომ განაცხადა, რომ სრუტეში საზღვაო მიმოსვლაზე მუდმივი კონტროლის დამყარების შემთხვევაში შეთანხმების მიღწევა შეუძლებელი იქნება.

პარალელურად, აშშ-ის პრეზიდენტმა დონალდ ტრამპმა უარყო ირანისა და ომანის ერთობლივი ინიციატივა, რომელიც სრუტეში მოძრაობის გასაკონტროლებლად სპეციალური საგადასახადო სისტემის შექმნას ითვალისწინებდა. დონალდ ტრამპის განცხადებით, ვაშინგტონი ამ საზღვაო გზას სრულად აკონტროლებს და გადასახადების დაწესებას არ დაუშვებს.

რაც შეეხება გამდიდრებული ურანის მარაგებს, აშშ მათ ქვეყნიდან გატანას აქტიურად ითხოვს. თეთრი სახლი შიშობს, რომ ეს მასალა ბირთვული იარაღის შესაქმნელად იქნება გამოყენებული. ირანის სულიერი ლიდერი, აიათოლა მოჯთაბა ხამენეი კი ქვეყნიდან ბირთვული მასალის გატანას კატეგორიულად ეწინააღმდეგება. მეტიც, ირანული მედიის მიერ გამოქვეყნებული ინფორმაციით, უმაღლესი სულიერი ლიდერი იმეორებს მამის, აიათოლა ალი ხამენეის პოზიციას და ბირთვული პროგრამის სამშვიდობო მიზნებით შენარჩუნებას აუცილებლად მიიჩნევს.