აშშ-მა ირანს ახალი სანქციები დაუწესა

აშშ-ის მთავრობამ სანქციების ახალი პაკეტი გამოაქვეყნა, რომელიც სამ ფიზიკურ პირსა და ცხრა კომპანიას ეხება. ვაშინგტონი მათ ირანული ნავთობის ჩინეთისთვის მიწოდებაში დახმარებასა და ფინანსურ მაქინაციებში ადანაშაულებს.

აღნიშნული გადაწყვეტილება მოჰყვა გასულ პარასკევს დაწესებულ სანქციებს, რომლებიც იმ პირებსა და ორგანიზაციებს შეეხო, ვინც ირანს დრონებისა და ბალისტიკური რაკეტების წარმოებისთვის საჭირო კომპონენტების შეძენაში ეხმარებოდნენ.

აშშ-ის ხაზინის დეპარტამენტის (OFAC) სამიზნეში მოხვდნენ კომპანიები, რომლებიც ბაზირებულნი არიან ჰონგ-კონგში, არაბთა გაერთიანებულ საამიროებსა და ომანში:

ჰონგ-კონგი: ოთხი კომპანია, მათ შორის Hong Kong Blue Ocean Ltd და Jiandi HK Ltd. უწყების ცნობით, ისინი ირანის ისლამური რევოლუციის გუშაგთა კორპუსის (IRGC) მიერ ნავთობის გასაყიდად შექმნილ „ფასადურ“ კომპანიებს წარმოადგენდნენ.

არაბთა გაერთიანებული საამიროები: ოთხი კომპანია, მათ შორის დუბაიში მოქმედი Ocean Allianz Shipping LLC, რომელიც ირანული ნავთობის ტრანსპორტირებას „ჩრდილოვანი ფლოტის“ ტანკერების მეშვეობით ახდენდა.

ომანი: ლოგისტიკური ჯგუფი Zeus Logistics Group.

რაც შეეხება ფიზიკურ პირებს, სანქცირებულები არიან IRGC-ის ნავთობის შტაბ-ბინის თანამშრომლები, რომლებიც კოორდინაციას უწევდნენ ფინანსურ ოპერაციებს თურქული კომპანია Golden Globe-ის მეშვეობით.

აშშ-ის ხაზინის მდივანმა, სკოტ ბესენტმა განაცხადა, რომ ტრამპის ადმინისტრაცია გააგრძელებს სანქციების გამოყენებას, რათა ირანის ხელისუფლებას იარაღის წარმოებისთვის, ბირთვული პროგრამისა და რეგიონული პროქსი-ჯგუფების დაფინანსების წყაროები გადაუკეტოს.

პარალელურად, სახელმწიფო დეპარტამენტმა გამოაცხადა ჯილდო 15 მილიონ დოლარამდე ნებისმიერი ინფორმაციისთვის, რომელიც ხელს შეუწყობს IRGC-ის ფინანსური მექანიზმების ჩაშლას.