აშშ-მა ირანთან ბირთვული შეთანხმების ტექსტი თითქმის შეათანხმა

აშშ-ის პრეზიდენტის, დონალდ ტრამპის ადმინისტრაციამ ირანთან ბირთვულ შეთანხმებაზე მუშაობის პრაქტიკულად დასრულება დაადასტურა. არსებული ინფორმაციით, მხარეებს შორის მოლაპარაკებები დაახლოებით 90-95 პროცენტით დასრულდა, თუმცა დოკუმენტის დაუყოვნებლივ ხელმოწერა არ იგეგმება.

ამერიკელმა მაღალჩინოსნებმა ჟურნალისტებთან საუბრისას ხაზგასმით აღნიშნეს, რომ საბოლოო შეთანხმების გასაფორმებლად მხარეები გარკვეულ დროს კიდევ მოითხოვენ.

როგორც ირკვევა, თეირანი ბირთვული იარაღის შესაქმნელად საკმარისად გამდიდრებული ურანის მარაგების განადგურებას პრინციპების დონეზე დათანხმდა.

ცნობისთვის, ატომური ენერგიის საერთაშორისო სააგენტოს მონაცემებით, ირანი ამჟამად 60 პროცენტამდე გამდიდრებულ 440 კილოგრამზე მეტ ურანს ფლობს. დასახელებული მოცულობა სამოქალაქო ენერგეტიკის საჭიროებებს მნიშვნელოვნად აღემატება და ის სამხედრო მიზნებისთვის საჭირო მაჩვენებელს უახლოვდება.

ამჟამად მხარეები ბირთვული მასალების განადგურების პროცესის განხორციელებისა და ვერიფიკაციის მექანიზმებზე მსჯელობენ. ამასთან, მოლაპარაკებების მონაწილეები სპეციალურ ჩარჩო ხელშეკრულებას განიხილავენ, რომელიც ყოვლისმომცველი დოკუმენტის საბოლოო ვარიანტის მოსამზადებლად 60-დღიანი ვადის გამოყოფას ითვალისწინებს.

პარალელურად, ახალი ინიციატივა სანქციების ეტაპობრივ შემსუბუქებას ირანის მიერ ნაკისრი ვალდებულებების შესრულების პარალელურად ითვალისწინებს. ამასთან, ვაშინგტონი ჰორმუზის სრუტეში კომერციული გემების უსაფრთხო გადაადგილების სანაცვლოდ ირანზე საზღვაო ბლოკადის რეჟიმის შემსუბუქებას გეგმავს.

მნიშვნელოვანია ითქვას, რომ, ამერიკული მხარე დიპლომატიის წარუმატებლობის შემთხვევაში სამხედრო სცენარს კვლავ განიხილავს.