აშშ-მა უკრაინისთვის $373.6 მილიონის ღირებულების მაღალი სიზუსტის საბრძოლო მასალების მიყიდვა დაამტკიცა

ამერიკის შეერთებული შტატების სახელმწიფო დეპარტამენტმა უკრაინისთვის 1,532 ერთეული JDAM-ER-ის ტიპის მართვადი ბომბების კომპლექტის მიყიდვა დაამტკიცა.

გარიგების საერთო ღირებულება $373.6 მილიონს შეადგენს. როგორც ირკვევა, კიევმა ჯამურად 1,200 ერთეული KMU-572 და 322 ერთეული KMU-556 მოდელის კომპლექტი მოითხოვა და დასტური დღეს მიიღო.

როგორც ანალიტიკოსები აცხადებენ, შტატების მხრიდან გადაწყვეტილების მიღება ომში მყოფ ქვეყანას თავდაცვისუნარიანობის გაძლიერებაში დაეხმარება, თუმცა, როგორც სახელმწიფო დეპარტამენტში განმარტავენ, დასახელებული შეიარაღების გადაცემა რეგიონში არსებულ ძალთა ბალანსს არ შეცვლის და არ გამოიწვევს მკვეთრ რეაქციას კრემლისაგან.

აღსანიშნავია, რომ დამტკიცებული პაკეტი საბრძოლო მასალების გარდა სხვადასხვა დამხმარე აღჭურვილობასაც მოიცავს. ხელშეკრულება FMU-139 ტიპის ასაფეთქებლების, სათადარიგო ნაწილების, პროგრამული უზრუნველყოფისა და ტექნიკური დოკუმენტაციის გადაცემასაც ითვალისწინებს. საყურადღებოა, რომ პროექტის მთავარი კონტრაქტორი კომპანია Boeing-ი იქნება. ამასთან, ამერიკული მხარე უკრაინელ სამხედროებს ლოგისტიკურ და საინჟინრო მომსახურებასაც გაუწევს. ვაშინგტონში მიიჩნევენ, რომ უკრაინის შეიარაღებული ძალები ახალი სისტემების ათვისებას სირთულეების გარეშე შეძლებენ.

ცნობისთვის, JDAM-ის სისტემები ჩვეულებრივ ბომბებს მაღალი სიზუსტის იარაღად აქცევს. მართვის სტანდარტული კომპლექტი GPS-ის მიმღებსა და სანავიგაციო მოწყობილობებს მოიცავს. ER, იგივე უფრო ფართო მანძილზე მოქმედებაზე გათვლილი მოდელი კი დამატებითი ფრთებითაა აღჭურვილი, რაც ჭურვის სამოქმედო რადიუსს 72.4 კილომეტრამდე ზრდის.