აშშ-ში ელექტრომობილების მფლობელებისთვის შესაძლოა ყოველწლიური გადასახადი დაწესდეს

აშშ-ის კონგრესმენებმა შეიმუშავეს ახალი ორპარტიული კანონპროექტი, რომელიც ელექტრომობილებისა და ჰიბრიდული ავტომანქანების მფლობელებისთვის გზების მოვლის ყოველწლიური გადასახადის დაწესებას ითვალისწინებს. არსებული ინფორმაციით, დამტკიცების შემთხვევაში ინიციატივა ძალაში 2027 წლის 30 სექტემბრის შემდეგ შევა და ის ბიუჯეტში დამატებითი სახსრების მობილიზებას უზრუნველყოფს.

ახალი რეგულაციით ელექტრომობილების მფლობელები ყოველწლიურად დამატებით $130-ს გადაიხდიან. დასახელებული მოსაკრებელი ყოველ ორ წელიწადში $5-ით გაიზრდება და მაქსიმუმ $150-ს მიაღწევს. რაც შეეხება ჰიბრიდულ ავტომობილებს, მათი მფლობელებისთვის გადასახადი საწყის ეტაპზე $35-ით განისაზღვრება. ამჟამად ბენზინზე მომუშავე ავტომობილების მფლობელები ინფრასტრუქტურის განვითარების საფასურს სპეციალური საწვავის გადასახადით იხდიან.

ახალი დოკუმენტი ტრანსპორტისა და ინფრასტრუქტურის კომიტეტის თავმჯდომარემ სემ გრეივსმა და დემოკრატმა კონგრესმენმა რიკ ლარსენმა მოამზადეს. ავტორების განცხადებით, ეს ნაბიჯი გზებისა და ხიდების აღდგენას და ალტერნატიული სატრანსპორტო ინფრასტრუქტურის განვითარებას მნიშვნელოვნად დაეხმარება.

ელექტრომობილების ინდუსტრიის ასოციაციის ZETA-ს აღმასრულებელმა დირექტორმა ალბერტ გორმა ახალ ინიციატივას მკაცრი, "სასჯელის მსგავსი გადასახადი" უწოდა. მისი განცხადებით, ამ გადაწყვეტილებას ეკოლოგიური ტრანსპორტის მომხმარებლებზე არაპროპორციული გავლენა ექნება. ორგანიზაციის ხელმძღვანელი მიიჩნევს, რომ მოქალაქეებმა მოსაკრებელი გზების გამოყენების მიხედვით უნდა გადაიხადონ. ასოციაცია გეგმავს, რომ კონგრესთან ერთად გზების გამოყენების უფრო სამართლიანი საფასურის დასადგენად აქტიურად ითანამშრომლოს.

ცნობისთვის, მსგავსი მოსაკრებელი დონალდ ტრამპის ადმინისტრაციის თავდაპირველ ინიციატივაშიც იგეგმებოდა. მაშინ ელექტრომობილების მფლობელებისთვის გადასახადი $250-ს შეადგენდა, თუმცა ეს პუნქტი დოკუმენტის საბოლოო ვერსიიდან სრულად ამოიღეს.