აშშ-ში მწარმოებელთა ფასების ინდექსი მოსალოდნელზე მეტად გაიზარდა

ამერიკის შეერთებულ შტატებში საბითუმო ფასები მაისში 1.1%-ით გაიზარდა, რამაც წლიური ინფლაციის მაჩვენებელი 6.5%-მდე აიყვანა.

აშშ-ის შრომის სტატისტიკის ბიუროს მიერ ხუთშაბათს გამოქვეყნებული მონაცემებით, დაფიქსირებული ნიშნული 2022 წლის ნოემბრის შემდეგ ყველაზე მაღალია. აღსანიშნავია, რომ Dow Jones-ის მიერ გამოკითხული ეკონომისტები თვიურ ჭრილში მაჩვენებლის მხოლოდ 0.7%-იან ზრდას პროგნოზირებდნენ.

არსებული ინფორმაციით, ინფლაციური წნეხის მატება ძირითადად საწვავის ფასების ზრდით არის განპირობებული, რამაც მწარმოებლებისთვის საბოლოო მოთხოვნის ხარჯები მნიშვნელოვნად გაზარდა.

რაც შეეხება საბაზისო ინფლაციას, სურსათისა და ენერგომატარებლების გამოკლებით, მაჩვენებელი მაისში 0.4%-ით გაიზარდა, რაც ანალიტიკოსების მიერ ნავარაუდებ 0.5%-იან ნიშნულზე ნაკლები აღმოჩნდა. ამასთან, წლიურ ჭრილში საბაზისო მწარმოებელთა ფასების ინდექსმა (Core PPI) 4.9% შეადგინა და აპრილის მაჩვენებელთან სრულ თანხვედრაში დაფიქსირდა.

ექსპერტების შეფასებით, მიმდინარე მონაცემები პანდემიისდროინდელი სტიმულირების პერიოდის ინფლაციურ დონეს უახლოვდება. შექმნილი ვითარების გათვალისწინებით, ფინანსურ ბაზრებზე აშშ-ის ფედერალური რეზერვის მიერ საპროცენტო განაკვეთის ზრდის მოლოდინები კიდევ უფრო მეტად გამყარდა.