ავიაკატასტროფა ალასკაზე - ჩარტერული თვითმფრინავის ჩამოვარდნას 8 ადამიანი ემსხვერპლა

ალასკის დასავლეთ ნაწილში, სამხედრო სარადარო ბაზასთან ახლოს ჩარტერულმა თვითმფრინავმა კატასტროფა განიცადა, რის შედეგადაც ბორტზე მყოფი რვავე ადამიანი - ორი პილოტი და ექვსი მგზავრი დაიღუპა.

უბედური შემთხვევა ხუთშაბათს, დანიშნულების ადგილზე დაშვებამდე ცოტა ხნით ადრე მოხდა. მსხვერპლთა შორის აშშ-ის არმიის ინჟინერთა კორპუსის ორი თანამშრომელიცაა.

ავიაკატასტროფის გამომწვევი მიზეზი ჯერჯერობით უცნობია. მომხდარს აშშ-ის ტრანსპორტის უსაფრთხოების ეროვნული საბჭო და ფედერალური საავიაციო ადმინისტრაცია იძიებენ.

აღსანიშნავია, რომ Cape Newenham-ის აეროპორტის რთულ, მთიან რელიეფზე განთავსებულ ასაფრენ ზოლზე დაშვების უფლება მხოლოდ სამხედრო და სპეციალურად ნებადართულ ჩარტერულ რეისებს აქვთ.