აზერბაიჯანთან მიღწეული შეთანხმება გაზის ტარიფების სტაბილურობის გარანტიაა - გია არაბიძე
ენერგეტიკოსი გია არაბიძე ე.წ. დამატებითი გაზის მოწოდებაზე აზერბაიჯანთან გაფორმებულ ახალ შეთანხმებას ქვეყნისთვის სტრატეგიულად მომგებიანს უწოდებს. მისი თქმით, 500 მილიონი კუბური მეტრი გაზი საქართველოსთვის მთლიანი წლიური მოხმარების თითქმის მეხუთედია. ამ მოცულობის გარშემო არსებული გაურკვევლობა კი, ენერგოსისტემისთვის გარკვეულ რისკებს ქმნიდა.
„500 მილიონი დამატებითი გაზის რაოდენობის ბედი გადაწყდა. ეს ძალიან მნიშვნელოვანი იყო ჩვენთვის იმიტომ, რომ თითქოს ჰაერში იყო ჩამოკიდებული ეს საკითხი და ძალიან მნიშვნელოვანია, რომ მოგვარდა“ - აცხადებს გია არაბიძე BMG-სთან.
მისივე განმარტებით, საქართველოსთვის პრობლემას არ წარმოადგენს გაზის ფიზიკურად მოპოვება, რადგან ინფრასტრუქტურა ამის საშუალებას იძლევა, თუმცა, მთავარი გამოწვევა ყოველთვის იყო ფასი, რომელიც სოციალურ ტარიფს დააწვებოდა ტვირთად.
"კომერციული გაზის პრობლემა საქართველოში არ არის. რუსეთიდან მომავალ მილსადენს შეუძლია 10-12 მილიარდი კუბური მეტრის გატარება, თუმცა, მხოლოდ 2.5-3 მილიარდს ატარებს. ანუ, ეს მილი დიდწილად ცარიელია. გაზის შოვნა არ არის პრობლემა არც რუსეთიდან და არც აზერბაიჯანიდან. აქ იყო საუბარი იმაზე, რომ ის 500 მილიონი კუბური მეტრი გაზი შემოგვეტანა კომერციულ ფასზე დაბალ ფასად.
ეს აბსოლუტურად უზრუნველყოფს ჩვენი გაზის სისტემის საიმედოობას და ტარიფებს. გაზის ტარიფი ნიშნავს იმას, რომ თბოელექტროსადგურების მიერ გამომუშავებულ ელექტროენერგიაზე უკვე შეიძლება სტაბილურად ვიფიქროთ. შესაბამისად, ჩვენს სამომხმარებლო ტარიფს აქვს მყარი საფუძველი, რომ უფრო დადებითი იყოს," - განმარტავს არაბიძე.
არაბიძის თქმით, ეს შეღავათიანი მოცულობა ე.წ. 5%-იან სოციალურ გაზს შეუერთდება, რაც საბოლოო ჯამში "სოციალური ფასის" შენარჩუნების საშუალებას იძლევა.
კითხვაზე, თუ რატომ აგრძელებს საქართველო რუსული გაზის გარკვეული მოცულობების მიღებას აზერბაიჯანული რესურსის ფონზე, ენერგეტიკოსი ტექნიკურ მიზეზებს ასახელებს. მისი თქმით, ეს აუცილებელია სისტემის დაბალანსებისა და პიკური მოთხოვნის დასაკმაყოფილებლად.