Bayer-ის კვარტალური მოგება პროგნოზებს მნიშვნელოვნად გასცდა

გერმანული ფარმაცევტული გიგანტის, Bayer AG-ის შემოსავალმა 2026 წლის პირველ კვარტალში €13.4 მილიარდი ($14.5 მლრდ.) შეადგინა, რაც წლიურ ჭრილში 4%-იანი ზრდაა, თუმცა ანალიტიკოსების მოლოდინებს მცირედით ჩამორჩება.

კომპანიის EBITDA-ს მაჩვენებელი 9%-ით გაიზარდა და €4.5 მილიარდს ($4.9 მლრდ.) მიაღწია. ამასთან, აქციაზე წმინდა მოგებამ €2.71 შეადგინა, რაც საპროგნოზო €2.28-ს თითქმის 19%-ით აჭარბებს. აღნიშნული ზრდა სალიცენზიო შეთანხმებებიდან და აქტივების რეალიზაციიდან მიღებულმა შემოსავლებმა განაპირობა.

მნიშვნელოვანია ითქვას, რომ ზრდის მთავარი მამოძრავებელი ძალა Crop Science-ის მიმართულება იყო. აღნიშნულმა დეპარტამენტმა სარგებელი სალიცენზიო შეთანხმებიდან მიღებული მაღალი შემოსავლების ხარჯზე მიიღო. სამომხმარებლო ჯანდაცვის სექტორში გაყიდვები 5%-ით გაიზარდა, მიუხედავად იმისა, რომ ჩინეთისა და აშშ-ის ბაზრებზე რთული ვითარება ნარჩუნდება. რაც შეეხება ფარმაცევტულ მიმართულებას, მისი მაჩვენებლები უცვლელი დარჩა, რაზეც გავლენა ფასების მხრივ არსებულმა წნეხმა და ახალ პროექტებზე ჩადებულმა მსხვილმა ინვესტიციებმა იქონია.

საყურადღებოა, რომ თავისუფალი ფულადი ნაკადების მაჩვენებელი უარყოფითია და -€2.3 მილიარდს ($2.5 მლრდ.) უტოლდება. ეს შედეგი სასამართლო დავების მოგვარების პროცესში არსებულ ფინანსურ ვალდებულებებთან არის დაკავშირებული.

ფისკალური 2026 წლისთვის Bayer-ი აქციაზე €4.97-ის ოდენობით მოგებას პროგნოზირებს. კომპანიის მენეჯმენტი მიიჩნევს, რომ სავალუტო კურსების მერყეობის მიუხედავად, ის დადგენილი მიზნების მიღწევას შეძლებს. როგორც ირკვევა, კომპანია დიდ იმედებს ამყარებს პრეპარატ "კერენდიას" გაყიდვების ზრდაზე.

აღსანიშნავია, რომ მონაცემების გამოქვეყნების შემდეგ ფარმაცევტული გიგანტის აქციების ფასი 6.16%-ით გაიზარდა. ამჟამად ერთი აქცია €39.31-ად ივაჭრება, კაპიტალიზაცია კი $45.4 მილიარდს შეადგენს.