„ბაზარზე არსებულ სისტემურ პრობლემებს ფიზიკურად ვერ მოვერიეთ“ - „კერკის“ წარმადობა 15%-მდე შემცირდა
მშრალი ხილის ადგილობრივი წარმოებამ, რომელიც ბაზარზე „კერკის“ ბრენდით პოზიციონირებს, წარმადობა შეამცირა. კომპანიის მმართველი პარტნიორი BM.GE-სთან ოპერირების სირთულეებზე საუბრობს და აცხადებს, რომ „კერკის“ წლიური შემოსავალი 0.5 მლნ ლარს არ აღემატება. გენო გელაძის ინფორმაციით, დღეისთვის მაღალმთიან აჭარაში მდებარე საწარმოს დატვირთვა 15%-მდეა შემცირებული.
„სამწუხაროდ, წლიურად „კერკი“ ნახევარ მილიონ ლარის შემოსავალს ვერ სცდება. დღეს ქარხანა, დაახლოებით, 15%-იანი დატვირთვით მუშაობს, შეიძლება არც. ჩვენ ქარხნის შენახვა ინვესტირებით გვიწევს, მაშინ როდესაც შესაძლებლობა გვაქვს, ვიყოთ ბევრად დიდები.
წარმოებაში 5 მიმართულება გვაქვს - ჩირი, სნექი, ხილეული, ტყლაპი, შერეული ხილი - ჯამში სულ 20-მდე დასახელების პროდუქტია. თუმცა სერიოზული წარმოებით უფრო მეტად ექვსი-შვიდი დასახელების პროდუქტი იყიდება.
ჩვენ გვაქვს სადანადგარო-საწარმოო ხაზები, ISO სტანდარტით, ხარისხით გაკეთებული საწარმო, რომელიც ხილის გადამუშავებისთვის ყველა დანადგარს ფლობს, თუმცა ყოველ წელს წარმოებას არათუ ვზრდიდით, არამედ ვამცირებდით“, - ამბობს „კერკის“ მმართველი პარტნიორი და დასძენს, რომ თუ თავიდან წარმოებაში 40 ადამიანი იყო დასაქმებული, წარმადობის შემცირების შემდეგ დასაქმებულთა რაოდენობაც 14-15-მდე შემცირდა.
წარმოების შემცირების მიზეზად გენო გელაძე ბაზარზე არსებულ არაჯანსაღ კონკურენციას და ქსელურ მარკეტებში ადგილობრივი პროდუქტის შესვლის სირთულეებს ასახელებს. ის ამბობს, რომ კომპანია ბაზარზე არსებულ სისტემურ პრობლემებს ვერ გაუმკლავდა.
„პრობლემა გვაქვს ამ შემთხვევაში პროდუქტების, სწორი პროდუქტების წარმოება-რეალიზებაში. ეს მხოლოდ სავაჭრო ქსელების ამბავი არ არის. ეს რაღაც კუთხით ჩვენი ბრალეულობაცაა, რომ მშრალ ხილზე არ უნდა შევჩერებულიყავით, მაგრამ სხვა რამეც რომ გვეკეთებინა, არ ვარ დარწმუნებული, რომ ქსელებთან მაინც ადვილად ვითთანამშრომლებდით რა. მთავარი პრობლემა, რაც გვაქვს, ის არის რომ ჩვენ როცა ნატურალურ პროდუქტებს ვაკეთებთ, გვადარებენ არაჯანსაღ პროდუქტებს და უბრალოდ, ვერაფერს ვეღარ ვაკეთებთ. ეს სერიოზული პრობლემაა. ვფიქრობ, სხვა პროდუქტებიც რომ გვქონოდა, იქაც იგივე პრობლემის წინაშე დავდგებოდით.