ბენზინგასამართი სადგურების ოპერატორების საშუალო ხელფასი 1300-დან 1500 ლარამდეა - "რომპეტროლი"
"რომპეტროლის" მომარაგებისა და ლოგისტიკის მენეჯერის, მედეა წერეთელის განცხადებით, ბენზინგასამართი სადგურების ოპერატორების საშუალო ანაზღაურება 1300-დან 1500 ლარამდეა. მან ამის შესახებ ფასების საპარლამენტო კომისიაზე განაცხადა, სადაც კომპანიის შესახებ ისაუბრა.
"საქართველოში წარმოდგენილები ვართ 81 ბენზინგასამართი სადგურით. ვოპერირებთ 4 ქვეყანაში: რუმინეთი, მოლდოვა, ბულგარეთი და საქართველო. ქსელი საერთო ჯამში ამ ქვეყნებში 1300-ზე მეტ სადგურს მოიცავს. დასაქმებული გვყავს 905 ადამიანი.
ბენზინგასამართ სადგურებზე საშუალოდ ხელფასი არის 1000 ლარი და კვარტალური ბონუსები აქვთ კიდევ. 24-საათიანი ცვლებია ბენზინგასამართ სადგურებზე. ბონუსების ჩათვლით საშუალოდ 1300-დან 1500 ლარამდე გამოსდით ხელფასი [ბენზინგასამართი სადგურების ოპერატორებს]",- თქვა მედეა წერეთელმა.
შეგახსენებთ, დღეს "ფასების საპარლამენტო კომისია" ნავთობკომპანიებს უსმენს. კომისია საკანონმდებლო ორგანოში თებერვლის დასაწყისში, სამი თვის ვადით შეიქმნა. მის მიზნად ფასწარმოქმნის მექანიზმების შესწავლის შემდეგ სხვადასხვა პროდუქტზე ფასების დარეგულირებისთვის რეკომენდაციების მომზადება სახელდება. კომისია უკვე შეხვდა რითეილ სექტორის, სადისტრიბუციო და ფარმაცევტული კომპანიების წარმომადგენლებს, ასევე, მწარმოებლებს და ა.შ.