Blue Origin-ის რაკეტა გამოცდის დაწყებისთანავე აფეთქდა

ჯეფ ბეზოსის კოსმოსური სტარტაპის, Blue Origin-ის უეკიპაჟო რაკეტა New Glenn-ი ფლორიდის კოსმოდრომზე გამოცდის დაწყებისთანავე აფეთქდა.

ხომალდს კომპანია ახალი მისიისთვის რამდენიმე თვის განმავლობაში ამზადებდა და მას ორბიტაზე Amazon-ის 48 თანამგზავრი უნდა გაეყვანა. აღსანიშნავი ფაქტია, რომ ინციდენტის დროს ეს ტვირთი ხომალდზე განთავსებული არ ყოფილა.

„ძალიან მძიმე დღეა, თუმცა ჩვენ აღვადგენთ ყველაფერს, რაც საჭიროა და ფრენებს დავუბრუნდებით“ - დაწერა სოციალურ ქსელში X ჯეფ ბეზოსმა რაკეტის აფეთქების შემდეგ. მან აღნიშნა, რომ მომხდარის ზუსტი მიზეზის დასახელება ჯერჯერობით რთულია. „ამ კლასის ახალი რაკეტების შექმნა უაღრესად რთული პროცესია და ის ერთ შეცდომასაც არ გვპატიობს", - დაწერა NASA-ს აღმასრულებელმა დირექტორმა, ჯარედ ისააკმენმა, რომელიც მომხდარს ასევე გამოეხმაურა. მისი განცხადებით, სააგენტო ინციდენტის გამოძიების პროცესში Blue Origin-თან მჭიდროდ ითანამშრომლებს.

ანალიტიკოსების შეფასებით, მომხდარი ჯეფ ბეზოსის კოსმოსური კომპანიის რეპუტაციაზე უარყოფითად იმოქმედებს. როგორც ცნობილია, ის ბაზარზე ილონ მასკის კომპანია SpaceX-თან არსებული ჩამორჩენის შემცირებას ცდილობს. კოსმოსური კომპანიის, რომელმაც ახალი თაობის ხომალდი Starship-ი გასულ კვირას წარმატებით გამოცადა.