Bolt-ის CEO-მ განაცხადა, რომ სრული HR გუნდი "არარსებული პრობლემების შექმნის" გამო გაუშვა

ამერიკული საგადამხდელო კომპანია Bolt-ის აღმასრულებელმა დირექტორმა კოპანიიდან HR გუნდი დაითხოვა. როგორც რაიან ბრესლოუმ განაცხადა, მან დეპარტამენტი გააუქმა, რათა კომპანიაში არსებულ "პრივილეგირებულობის განცდასთან" ებრძოლა.

ბრესლოუმ კომპანია სტენფორდის საერთო საცხოვრებელში 2014 წელს დააარსა, 2022 წელს დატოვა, 2025 წლის მარტში კი აღმასრულებელი დირექტორის პოსტზე დაბრუნდა. ფინანსური მდგომარეობის გაუმჯობესების მიზნით, გასულ თვეში Bolt-მა თანამშრომლების 30% შეამცირა.

"ჩვენ გვყავდა HR გუნდი და ეს გუნდი ქმნიდა პრობლემებს, რომლებიც არ არსებობდა. ეს პრობლემები გაქრა, როდესაც მე ისინი გავუშვი", - განაცხადა ბრესლოუმ ამ კვირაში Fortune-ის Workforce Innovation Summit-ზე.

ბრესლოუმ HR სფერო მანამდეც გააკრიტიკა. გასულ წელს მან LinkedIn-ზე დაწერა, რომ სურდა თანამშრომლები "უფრო მეტად ორიენტირებული ყოფილიყვნენ ეფექტურობაზე და ნაკლებად - ფუჭ დეტალებზე".

თავდაპირველად მან HR დეპარტამენტს სახელი გადაარქვა და მას "ადამიანური ოპერაციები" (people ops) უწოდა, და აღნიშნა, რომ მას "არასწორი ენერგია, ფორმატი და მიდგომა" ჰქონდა.

Bolt-ის საბაზრო ღირებულებამ 2022 წელს რეკორდულ 11 მილიარდ დოლარს მიაღწია, თუმცა ორი წლის შემდეგ დაახლოებით 300 მილიონ დოლარამდე დაეცა, რაც თითქმის 97%-იან კლებას ნიშნავს. ბრესლოუმ გააკრიტიკა კულტურა, რომელიც კომპანიაში მისი არყოფნის დროს ჩამოყალიბდა.

"კომპანიაში გაჩნდა პრივილეგირებულობის განცდა; ადამიანები, რომლებიც თავს ძლიერად და პრივილეგირებულად გრძნობდნენ, სინამდვილეში ბევრს არ მუშაობდნენ.

ეს იყო მთავარი პრობლემა, რომელსაც უნდა შევბრძოლებოდი. საბოლოოდ, ამ ადამიანების უმეტესობის გაშვება მოგვიწია. ჩვენ გვჭირდება ხალხი, რომლებიც ორიენტირებულნი არიან საქმის კეთებაზე, აქ კი უბრალოდ ჩამოყალიბდა საქმის არკეთებისა და წუწუნის კულტურა", - განაცხადა მან.