ჩემთვის ცოტა გაუგებარია, რომელ სექტორებში აკუმულირდება ეკონომიკური ზრდა|თამაზ დაუშვილი
კომპანია “დიოს” მმართველი პარტნიორი, ბიზნესმენი თამაზ დაუშვილი ეკონომიკის ზრდის მაღალ ტემპს, რომელიც პირველ კვარტალშიც შენარჩუნდა [იანვარ-მარტში ეკონომიკა 9.1%-ით გაიზარდა, უშუალოდ მარტში ზრდა 10.7% იყო], სკეპტიკურად უყურებს.
“ჩემთვის ცოტა გაუგებარია, რომელ სექტორებში აკუმულირდება ეკონომიკური ზრდა”, - თქვა მან BMGTV-ის გადაცემა “წერტილში” და იქვე დასძინა, რომ მისი დაკვირვებით, რეალურ სექტორში, განსაკუთრებით მშენებლობასა და ტურიზმში, მაღალი ზრდის ასახვას ვერ ხედავს.
სად აკუმულირდება ეს ზრდა და რამდენად რჩება ეს ფული ქვეყანაში? - ეს ის ორი მთავარი კითხვაა რაზედაც თამაზ დაუშვილს პასუხები ყველაზე მეტად აინტერესებს.
„[ეკონომიკის ზრდის შესახებ] ციფრები, რა თქმა უნდა, გასახარია, მაგრამ საკმაოდ საინტერესოა, როგორ ხდება ეს და, ვთქვათ, სად აკუმულირდება აღნიშნული ზრდა. ჩემთვის ეს მართლაც ცოტა გაუგებარია, იმიტომ, რომ ჩემი და ჩვენი კოლეგა კომპანიების მაგალითზე, ვინც სამშენებლო სექტორში ვართ, არც შარშანდელი წელი და არც წლევანდელი არ გამოირჩევა რაიმე სახის ზრდით ან ბუმით.
ამიტომ საინტერესოა როგორ არის განაწილებული ეს ეკონომიკური ზრდა სხვადასხვა სექტორში. ბოლო პერიოდში დეტალურად არ გავცნობივარ, თუ კონკრეტულად რომელ სფეროებზე მოდის ის ან როგორ ხერხდება ამ მონაცემების მიღება, თუმცა ვიცი, რომ ძალიან დიდი შემოსავლები და ბრუნვაა IT სფეროში. ჩემი ინფორმაციით, რუსეთ-უკრაინის ომის შემდგომ საქართველოში ამ სფეროს, დაახლოებით, 24 000 წარმომადგენელი ჩამოვიდა, რომლებმაც, დაახლოებით, მილიარდი დოლარის ბრუნვის ანუ შემოსავლების გენერირება მოახდინეს. თუმცა არ ვიცი, ეს მხოლოდ რეგისტრაციაში ჩანს და თანხა რეალურად ეკონომიკას ხმარდება, თუ უბრალოდ მათ საბანკო ანგარიშებზე ილექება და შემდგომ ისევ უცხოეთში ირიცხება.
რამდენადაც ვიცი, არც ავტომობილების ექსპორტ-იმპორტი გაზრდილა დიდად. მშენებლობის სექტორზეც ვერ ვიტყვი, რომ სტაგნაციაშია, თუმცა არც ისეთი სტაბილურობაა, ზრდაზე რომ ვისაუბროთ. კარგი იქნება, ვნახოთ, რა ხდება ტელეკომუნიკაციებსა თუ ენერგეტიკაში… ტურიზმი არ იმატებს; მაქვს ინფორმაცია, რომ სასტუმროებს ნომრები ასეთი დაბალი ფასები აქამდე არ ყოფილა. არ ვიცი, სოფლის მეურნეობაში ან სხვა დარგებში რა ხდება… მართალი გითხრათ, ეს ყველაფერი ძალიან საინტერესოა”, - განაცხადა თამაზ დაუშვილმა.