ჩინეთი გერმანიის უმსხვილესი ავტომომწოდებელი გახდა

2026 წლის პირველ შვიდ თვეში გერმანიის უმსხვილესი საგარეო ავტომომწოდებელი ჩინეთი გახდა. არსებული ინფორმაციით, გერმანიაში ჩინური ავტომობილების იმპორტი გასული წლის ანალოგიურ პერიოდთან შედარებით 120%-ით გაიზარდა და 175,000 ერთეული შეადგინა.

ამ მაჩვენებლით ჩინეთმა გაუსწრო ჩეხეთს, საიდანაც გერმანულმა ბაზარმა 173,000 ავტომობილი მიიღო. რეიტინგში მესამე პოზიცია ესპანეთმა დაიკავა. ქვეყანამ გერმანიაში 157,000 სატრანსპორტო საშუალების ექსპორტი განახორციელა.

მნიშვნელოვანია ითქვას, რომ ჩინური მიწოდების მკვეთრი ზრდა უმთავრესად ელექტრომობილებისა და ჰიბრიდული მოდელების პოპულარობის ზრდამ განაპირობა. კერძოდ, ელექტრომობილების იმპორტი 66%-ით გაიზარდა, ჰიბრიდული მოდელების მიწოდებამ კი 36%-იანი მატება დააფიქსირა.

პარალელურად, ჩინეთიდან შიგაწვისძრავიანი სატრანსპორტო საშუალებების იმპორტი 9%-ით შემცირდა. ამ ცვლილებების ფონზე, გერმანიაში ჩინეთიდან იმპორტირებული ავტომობილების მთლიან მოცულობაში თანამედროვე ტრანსპორტის წილმა 56%-ს გადააჭარბა.

რაც შეეხება ქვეყნის მთლიან სავაჭრო მაჩვენებლებს, წლის პირველ შვიდ თვეში გერმანიის საერთო ავტოიმპორტი 16%-ით გაიზარდა და დაახლოებით 1.3 მილიონი ერთეული შეადგინა. ღირებულებით ნაწილში სატრანსპორტო საშუალებების იმპორტი 12%-ზე მეტით გაიზარდა და თითქმის €35 მილიარდს ($38.5 მლრდ.) მიაღწია. საპირისპიროდ, თავად გერმანიიდან ავტომობილების ექსპორტი 4%-ით შემცირდა და დაახლოებით 2 მილიონ ერთეულამდე დავიდა.

ცნობისთვის, გერმანია მსოფლიოს უმსხვილესი ავტომწარმოებლების სამშობლოა. ევროპულ ბაზარზე ჩინური ელექტრო და ჰიბრიდული მოდელების გაზრდილი წილი კი კონკურენციას ამძაფრებს და ქვეყნის ტრადიციულად ძლიერ საავტომობილო სექტორს გამოწვევებს უქმნის.