ჩინეთში BYD-ის გაყიდვები მერვე თვეა მცირდება

ელექტრომობილების მწარმოებელი გიგანტის, BYD-ის სამგზავრო ავტომობილების გაყიდვები ჩინეთის ბაზარზე, გასული წლის ანალოგიურ პერიოდთან შედარებით, 15.7%-ით შემცირდა. კომპანიისთვის ეს კლების უკვე მერვე თანმიმდევრული თვეა გრძელდება, რაც შიდა ბაზარზე კონკურენციის მკვეთრ გამწვავებაზე მიუთითებს.

წარდგენილი დოკუმენტაციის მიხედვით, BYD-იმ გასულ თვეს 314,100 ერთეული ელექტრო და ჰიბრიდული მოდელი გაყიდა. ადგილობრივი გაყიდვების ვარდნის ფონზე, კომპანიამ ექსპორტის ისტორიულ მაქსიმუმს მიაღწია — საზღვარგარეთ რეალიზებული ავტომობილების რაოდენობამ 135,098 შეადგინა, რაც 2025 წლის მონაცემებს 70%-ით აღემატება.

როგორც ირკვევა, BYD-ისგან განსხვავებით, მისი უახლოესი ჩინური კონკურენტები გაყიდვების რეკორდულ ზრდას აჩვენებენ. Leapmotor-მა აპრილში 71,387 ერთეული ავტომობილი გაყიდა, რაც წლიურად 73.9%-იანი ზრდაა. Geely-ს პრემიუმ ბრენდმა Zeekr-მა გაყიდვები 131.6%-ით გაზარდა, ხოლო ტექნოლოგიურმა გიგანტმა Xiaomi-მ 30,000-ზე მეტი ელექტრომობილის რეალიზაცია შეძლო. Nio-ს გაყიდვებმა 29,356 ერთეული შეადგინა, რაც 22.8%-იანი მატებაა.

მზარდი კონკურენციის პირობებში, ჩინური ავტომწარმოებლები აქტიურად ცდილობენ გლობალურ ბაზრებზე პოზიციების გამაგრებას. BYD-ი 2026 წელს ექსპორტის ერთ მილიონ ერთეულამდე გაზრდას გეგმავს. აღსანიშნავია, რომ კომპანია ლათინური ამერიკის ბაზრის ლიდერია და მექსიკაში ელექტრომობილების გაყიდვების 70%-ს აკონტროლებს, ევროკავშირში კი მისი რეგისტრაციების რაოდენობა 155%-ით გაიზარდა.

ფინანსური თვალსაზრისით, BYD-ისთვის მიმდინარე წლის პირველი კვარტალი რთული აღმოჩნდა. კომპანიის მოგება 55.4%-ით შემცირდა, ხოლო საოპერაციო შემოსავალმა $22 მილიარდი შეადგინა, რაც 11.8%-იანი კლებაა.