ჩვენი მიზანია, შემცირდეს აღქმა, რომ საზღვარგარეთ მკურნალობა აღემატება საქართველოში ხელმისაწვდომს - სარჯველაძე
"ჩვენი მიზანია, რომ მაქსიმალურად შემცირდეს მოქალაქეებს შორის აღქმა იმისა, რომ საზღვარგარეთ მკურნალობა აღემატება იმას, რაც ხელმისაწვდომია საქართველოში", - ამის შესახებ ჯანდაცვის მინისტრმა მიხეილ სარჯველაძემ პარლამენტში, ინტერპელაციის წესით გამოსვლისას ისაუბრა.
სარჯველაძის განცხადებით, მიუხედავად იმისა, რომ საზღვარგარეთ მკურნალობის მოთხოვნის მაჩვენებელი, საერთო სტატისტიკასთან შედარებით, მაღალ პროცენტს არ შეადგენს, პრობლემა საგულისხმოა და არაერთი მიზეზით არის განპირობებული.
"2025 წელს საყოველთაო ჯანდაცვის პროგრამის ფარგლებში ონკოლოგიური დაავადების მართვისთვის სერვისი 38 627 ბენეფიციარს მიეწოდა. არსებული სტატისტიკის მიხედვით, გასულ წელს საზღვარგარეთ მკურნალობის მოთხოვნით, ონკოლოგიის მიმართულებით, მკურნალობა დაუფინანსდა მხოლოდ 573 პაციენტს.
ონკოლოგიური სერვისებისთვის დამოუკიდებლად გასული პაციენტების რაოდენობა შესაძლოა აღემატებოდეს დასახელებულ რიცხვებს, თუმცა არა დრამატულად. 38 627 ბენეფიციართან შედარებით, საზღვარგარეთ მკურნალობის მოთხოვნის მაჩვენებელი, ვფიქრობთ, მაღალ პროცენტს არ შეადგენს. თუმცა უნდა დავეთანხმო მოსაზრებას, რომ პრობლემა მაინც საგულისხმოა და ამაზე ღიად ვსაუბრობთ ჩვენც", - ამბობს სარჯველაძე.
უცხოეთში მკურნალობისთვის უპირატესობის მინიჭების ერთ-ერთ მთავარ მიზეზად ის ადგილობრივი სამედიცინო პერსონალის ნაწილის კვალიფიკაციასა და დისციპლინას ასახელებს, რასაც, მისივე თქმით, განათლების სისტემაში არსებული დეფიციტებიც ემატება.
"უმცირესობაში, მაგრამ მაინც არიან ექიმები და ექთნები, რომლებსაც ზოგ შემთხვევაში კვალიფიკაციის, ზოგ შემთხვევაში კი დისციპლინის პრობლემები აქვთ. სამწუხაროდ, კვალიფიკაციის ნაკლებობა საკმაოდ რეალური გამოწვევაა საქართველოში და ამასთან დაკავშირებით საუბრობს ჩემთვის პატივსაცემი ყველა ექიმი.
გვაქვს პროფესიული დეფიციტების პრობლემაც, რაც დაკავშირებულია განათლების სისტემის რეფორმასთან. განათლების სისტემისთვის ორიენტირი უნდა იყოს, პირველ რიგში, იმ კადრების მომზადება, რომლებიც კრიტიკულად მნიშვნელოვანია ქართული ჯანდაცვის სისტემისთვის".