„Comforter არ ნებდება“ - ბრენდი კრიზისის შემდეგ განახლებული სივრცითა და ახალი პარტნიორებით დაბრუნდა
ხანძრის შედეგად დაზიანებული შოურუმის სრულად აღდგენიდან რამდენიმე დღეში ავეჯის ქართული ბრენდი Comforter მომხმარებლებს განახლებული სივრცით, ახალი კოლექციებითა და სპეციალური შეთავაზებებით უბრუნდება. კომპანიის წარმომადგენლების განცხადებით, კრიზისული პერიოდი ბრენდისთვის ერთდროულად ემოციური გამოწვევაც იყო და განვითარების ახალი ეტაპიც.
შოურუმის გახსნასთან დაკავშირებით Comforter მომხმარებლებს სპეციალურ აქციებს სთავაზობს. 11 მაისიდან 18 მაისის ჩათვლით ბრენდის სრულ კოლექციაზე 30%-იანი ფასდაკლება იმოქმედებს. შეთავაზება ავეჯის ყველა კატეგორიაზე გავრცელდება.
კომპანიის ინფორმაციით, მომხმარებლებს ადგილზე სრულად განახლებული კოლექციები, ახალი პარტნიორი ბრენდები და დამატებული ავეჯის კატეგორიები დახვდებათ.
როგორც Comforter-ის თანადამფუძნებელი ზურაბ მოსახლიშვილი bm.ge-სთან აცხადებს, ხანძრამდე გუნდი ახალი პროექტებისა და განვითარების გეგმებზე მუშაობდა, თუმცა ერთ დღეში რეალობა რადიკალურად შეიცვალა.
„სიმართლე რომ გითხრათ, ეს პერიოდი ჩვენთვის ემოციურად ერთ-ერთი ყველაზე მძიმე იყო. რამდენიმე დღით ადრე ვფიქრობდით ახალ გეგმებზე, განვითარებაზე და მომხმარებლისთვის კიდევ უფრო საინტერესო გარემოს შექმნაზე, თუმცა ერთ დღეში რეალობა სრულიად შეიცვალა. შოურუმი, რომელშიც ჩვენი გუნდის დაუღალავი შრომა იყო ჩადებული, დაიწვა.
მაგრამ ალბათ სწორედ ასეთ დროს ჩანს, რამდენად ძლიერი გუნდია ბრენდის უკან. 24-საათიან რეჟიმში, ფაქტობრივად შეუსვენებლად, 8 დღის განმავლობაში ვმუშაობდით იმისთვის, რომ აღგვედგინა სივრცე, ავეჯი და მთლიანად გარემო.
ჩვენთვის ყველაზე მნიშვნელოვანი იყო, რომ მომხმარებელს ეგრძნო Comforter არ ნებდება. პირიქით, ამ პროცესმა კიდევ უფრო გაგვაერთიანა და გვაჩვენა, რომ ერთად ბევრად მეტი შეგვიძლია. დღეს უკვე დაბრუნებულები ვართ და ვფიქრობ, უფრო ძლიერებიც, ვიდრე ადრე ვიყავით,“ - აცხადებს მოსახლიშვილი.