დღეს ეროვნული ბანკი მყარად დგას ფეხზე - პაატა კვიჟინაძე

„დღეს ეროვნული ბანკი მყარად დგას ფეხზე ყველა მიმართულებით, რაც ასე არასდროს ყოფილა“, - ამის შესახებ პარლამენტის საფინანსო-საბიუჯეტო კომიტეტის თავმჯდომარე პაატა კვიჟინაძემ კომიტეტის სხდომაზე განაცხადა, სადაც ეროვნული ბანკის 2025 წლის ანგარიში განიხილეს.

ანგარიში, რომელიც მოიცავს ეროვნული ბანკის ფულად-საკრედიტო, სავალუტო და საზედამხედველო პოლიტიკას და აუდიტირებულ ფინანსურ ანგარიშგებას, დეპუტატებს ეროვნული ბანკის პრეზიდენტმა ნათია თურნავამ გააცნო.

კომიტეტის თავმჯდომარემ შემაჯამებელ სიტყვაში რამდენიმე იმ მაჩვენებლებს გაუსვა ხაზი, რომელიც ფინანსური სისტემის მდგრადობას განაპირობებს.

„ლარის კურსი სტაბილურია, რეზერვები გაცდა 6 მილიარდს და ეს აკმაყოფილებს საერთაშორისო სტანდარტებს. ცუდი სესხები ე.წ. პრობლემური სესხები, რომლის მაჩვენებელი მნიშვნელოვანია საბანკო სექტორისთვის არის ძალიან დაბალ ნიშნულზე 2.6 %. მინდა შეგახსენოთ 2012 წელს იყო -12 %, ხოლო 2020 წელს 8-9%, ეს საუკეთესო მაჩვენებელია რეგიონში და უტოლდება ბევრ ევროპულ ქვეყანას. განსაკუთრებით მინდა დეპოზიტები გამოვყო: 10 წლის წინ დეპოზიტების ჯამური მოცულობა 14,4 მილიარდი იყო, როგორც ფიზიკური ისე იურიდიული პირების ანგარიშები ბანკებში. დღეს 66.95 მილიარდი ლარია, თითქმის თანაბარია როგორც მოსახლეობის ისე კერძო პირებისთვის. სტრუქტურულადაც გაუმჯობესდა. დოლარიზაცია 10 წლის განმავლობაში 71.7% -დან შემცირდა 47.8% მდე, რაც ძალიან კარგი შედეგია“, - განაცხადა პაატა კვიჟინაძემ და ეროვნული ბანკის პრეზიდენტს მადლობა გადაუხადა წარმატებული საქმიანობისთვის.