“ძალიან ხშირად ჯარიმებს და საურავებს კაბალური ხელშეკრულებები იწვევს”- პაატა ტრაპაიძე

ინფრასტრუქტურის მშენებელთა ასოციაცია ე.წ “ეკონომიკური ამნისტიის” ინიციატივას ამუშავებს, რომელიც იმ კომპანიებს უნდა შეეხოს, რომლებსაც ჯარიმები და პირგასამტეხლოები აქვთ დაკისრებული.

ინიციატივის მთავარი მიზანია, ბაზრის მოთამაშეებს მიეცეთ შანსი, გაჯანსაღებული ბალანსით დაუბრუნდნენ აქტიურ ბიზნესს. ინფრასტრუქტურის მშენებელთა ასოციაციის ხელმძღვანელის თქმით, ინიციატივა მიმართულია დარგის იმ მონაწილეებისკენ, რომლებიც ბაზარზე კეთილსინდისიერად მოქმედებენ.

კომპანია “კავკასუს როუდ პროჯექტის” მმართველი პარტნიორის პაატა ტრაპაიძის შეფასებით, სექტორში დაგროვილი ჯარიმები ხშირ შემთხვევაში იმ „კაბალურ ხელშეკრულებებს” უკავშირდება, რომლებიც დამკვეთსა და შემსრულებელს შორის წლების განმავლობაში ფორმდებოდა. ტრაპაიძის თქმით, დაკისრებული საურავები მნიშვნელოვნად ამცირებს სამშენებლო პროექტების მომგებიანობას, რაც ბანკებისთვის ამ სექტორს არამიმზიდველს ხდის.

„აქამდე კაბალური ხელშეკრულებები იყო დამკვეთსა და შემსრულებელს შორის. ძალიან ხშირად ეს ჯარიმები და საურავები გამოწვეული იყო ამ კაბალური ხელშეკრულებების მიზეზით. თუ გვინდა, რომ დავიწყოთ ამ სფეროს გაჯანსაღება, ის, რაც არასწორად იყო დარიცხული, ჩემი აზრით, უნდა მოიხსნას. ჩვენს კომპანიას არ ეხება ეს, მაგრამ ძალიან ბევრი კომპანიაა, რომელიც ამის გამო დიდ წნეხს განიცდის.

შედეგად ამ სექტორის მომგებიანობა მნიშვნელოვნად მცირდება და ბანკებთან ურთიერთობაში ზუსტად ამაშია საქმე, რომ ბანკები დღეს აყენებენ საკითხს, რომ ეს სექტორი არამომგებიანია”,-აცხადებს პაატა ტრაპაიძე.

მისივე თქმით, დონორული ხელშეკრულებები გაცილებით სამართლიანი და დაბალანსებულია, მაშინ როცა სახელმწიფო კონტრაქტებში მთელი პასუხისმგებლობა და რისკი შემსრულებელზე გადადის.

“აქამდეც არსებობდა და დღესაც არსებობს დონორების მიერ დაფინანსებული პროექტების ხელშეკრულებები და არსებობს ჩვენი ბიუჯეტის მიერ დაფინანსებული პროექტების ხელშეკრულებები. როგორ გგონიათ, ისინი ერთნაირია? რატომ არ უნდა იყოს ერთნაირი?