"ძლიერად ვმართავთ პროცესებს, ან მოწამეობრივად დავიღუპებით" - პეზეშკიანი გადადგომის შესახებ ცნობებს უარყოფს
ირანის პრეზიდენტმა მასუდ პეზეშკიანმა განაცხადა, რომ თანამდებობაზე მანამ დარჩება, სანამ ცოცხალია - ამის შესახებ ინფორმაციას ისლამური რევოლუციის გუშაგთა კორპუსთან (IRGC) დაკავშირებული მედია ავრცელებს.
„სანამ ჩემს სხეულში სიცოცხლეა, მანამ გავაგრძელებ მუშაობას. ჩვენ ან ძლიერად ვმართავთ პროცესებს, ან მოწამეობრივად დავიღუპებით. ჩვენ უნდა ვიყოთ ასპარეზზე და ვმართოთ სიტუაცია“, - განაცხადა პეზეშქიანმა მინისტრთა კაბინეტის სხდომაზე.
ეს იყო ირანის პრეზიდენტის პასუხი უცხოურ მედიაში გავრცელებულ ცნობებზე, რომელთა მიხედვითაც ის თანამდებობის დატოვებას გეგმავდა.
ინფორმაცია პრეზიდენტის შესაძლო გადადგომის შესახებ თავდაპირველად ბრიტანეთიდან მომუშავე უცხოურმა გამოცემა Iran International-მა გაავრცელა.
პრეზიდენტის ადმინისტრაციის კომუნიკაციებისა და ინფორმაციის დეპარტამენტის ხელმძღვანელმა სოციალურ ქსელ X-ში დაწერა, რომ ეს ინფორმაცია მხოლოდ ჭორების გავრცელება და ადრეული მედიათამაშების გაგრძელებაა. მისი თქმით, პეზეშქიანი არ დაიხევს უკან ხალხის სამსახურიდან, ხოლო ირანელების ეროვნული ერთიანობის გატეხვის იმედები ამაოა.
მთავრობის სპიკერმა, ფატემე მოჰაჯერანიმ, ასევე X-ზე აღნიშნა, რომ პეზეშკიანის ადმინისტრაციამ რთულ დღეებში დაამტკიცა ხალხის გვერდით დგომა და ქვეყნის პრობლემების მოგვარებაზე მუშაობა.
BM.GE
წყარო: bm.ge