ებოლას გავრცელების გამო, ქვეყნებმა სამოგზაურო შეზღუდვები გაამკაცრეს

ჯანდაცვის მსოფლიო ორგანიზაციამ (WHO) კვირას, 17 მაისს კონგოს დემოკრატიულ რესპუბლიკაში ებოლას ეპიდემია საერთაშორისო მნიშვნელობის საზოგადოებრივი ჯანდაცვის საგანგებო მდგომარეობად გამოაცხადა.

WHO-მ იგი მეზობელ ქვეყნებში მისი გავრცელების მაღალ რისკზე მიუთითა, რამაც მთავრობებს მოგზაურობასთან დაკავშირებული შემაკავებელი ზომების გამკაცრებისკენ უბიძგა.

გთავაზობთ სხვადასხვა ქვეყნის მიერ გამოცხადებული შემოწმების პროცედურებისა და სამოგზაურო შეზღუდვების ჩამონათვალს:

ამერიკის შეერთებული შტატები

გასულ კვირას ვაშინგტონმა აშშ-ში შესვლა აუკრძალა იმ არამოქალაქეებს (Non-citizens), რომლებმაც ბოლო კვირებში კდრ-ში, უგანდასა და სამხრეთ სუდანში იმოგზაურეს. პარასკევს დაავადებათა კონტროლისა და პრევენციის ცენტრმა (CDC) ეს აკრძალვა მწვანე ბარათის იმ მფლობელებზეც გაავრცელა, რომლებიც აღნიშნულ ქვეყნებში ბოლო 21 დღის განმავლობაში იმყოფებოდნენ.

ევროკავშირი

პარასკევს ევროკავშირის ჯანდაცვის უსაფრთხოების კომიტეტმა განაცხადა, რომ მოსახლეობისთვის დაბალი რისკის გათვალისწინებით, კდრ-დან და უგანდიდან ჩამოსული მგზავრებისთვის საზღვარზე სკრინინგი აუცილებელი არ იყო.

კანადა

კანადის მთავრობამ განაცხადა, რომ ოთხშაბათიდან კდრ-ის, უგანდისა და სამხრეთ სუდანის რეზიდენტებს კანადაში შესვლა 90 დღით აეკრძალებათ.

კანადის საზოგადოებრივი ჯანდაცვის სააგენტოს ცნობით, 30 მაისიდან, კანადის მოქალაქეებს, მუდმივ რეზიდენტებსა და სხვა უცხოელებს, რომლებიც ბოლო კვირებში დაზიანებულ ადგილებში იმყოფებოდნენ, მაგრამ სიმპტომები არ აღენიშნებათ, 21-დღიანი კარანტინის გავლა მოუწევთ.

ბაჰამის კუნძულები

ბაჰამის კუნძულების მთავრობამ განაცხადა, რომ კდრ-ის, უგანდისა და სამხრეთ სუდანის რეზიდენტებისთვის დაწესებული აკრძალვა დაუყოვნებლივ შევა ძალაში და 30 დღის განმავლობაში იმოქმედებს.

ბაჰამის კუნძულებმა ასევე გამოაცხადა გაძლიერებული სამედიცინო შემოწმებები და შესაძლო კარანტინი იმ უცხოელებისთვის, რომლებიც აღნიშნულ ქვეყნებში კარიბის ზღვის ქვეყანაში ჩასვლამდე 30 დღის განმავლობაში იმყოფებოდნენ.

ინდოეთი

ინდოეთმა აეროპორტებსა და სხვა გამშვებ პუნქტებზე სკრინინგისა და მეთვალყურეობის ზომები აამოქმედა, გამოსცა გაფრთხილებები სიფრთხილის ზომების შესახებ და მოქალაქეებს მოუწოდა, თავი შეიკავონ კონგოში, უგანდასა და სამხრეთ სუდანში არასაჭირო მოგზაურობისგან.

იორდანია

იორდანიის სახელმწიფო სააგენტოს ცნობით, 19 მაისს იორდანიის მთავრობამ კდრ-დან და უგანდიდან ჩამოსული მოგზაურებისთვის ქვეყანაში შესვლა შეაჩერა.

ბაჰრეინი

19 მაისს ბაჰრეინმა განაცხადა, რომ 30 დღით აჩერებს სამხრეთ სუდანიდან, კონგოს დემოკრატიული რესპუბლიკიდან და უგანდიდან უცხოელი მოგზაურების შემოსვლას.

კაიმანის კუნძულები

20 მაისს კაიმანის კუნძულების მთავრობამ განაცხადა, რომ პრევენციის მიზნით გაძლიერებულ სკრინინგს დანერგავს, რაც მოჰყვა იმ რეისის დაშვებას, რომელზეც კდრ-ში ახლახან ნამყოფი ორი მგზავრი იმყოფებოდა.

ტაილანდი

სამშაბათს ტაილანდის საზოგადოებრივი ჯანდაცვის სამინისტრომ განაცხადა, რომ კდრ-დან და უგანდიდან ჩამოსულ მგზავრებს ქვეყანაში შესვლა მხოლოდ სუვარნაბჰუმის აეროპორტიდან შეეძლებათ, სადაც ისინი სკრინინგს გაივლიან. ამ ქვეყნებიდან მომავალ ან ტრანზიტულ მოგზაურებს სიმპტომების არქონის შემთხვევაში მინიმუმ 21-დღიანი კარანტინი მოეთხოვებათ, ხოლო თუ ებოლას ვირუსთან თავსებადი სიმპტომები აღმოაჩნდებათ, მინიმუმ 21 დღით იზოლაციაში გადაიყვანენ.

კენია

კენიის ჯანდაცვის სამინისტროს ორშაბათის განცხადებით, მაღალი რისკის გამშვებ პუნქტებზე მგზავრთა სკრინინგი გაძლიერდა. პროცესს სრულად ამოქმედებული „ინციდენტების მართვის ეროვნული სისტემის“ ფარგლებში კენიის საზოგადოებრივი ჯანდაცვის ეროვნული ინსტიტუტი (KNPHI) კოორდინირებს. პოტენციური შემაკავებელი ზომების მხარდასაჭერად, დადგენილ სასაზღვრო პუნქტებზე საიზოლაციო და მოსაცდელი ობიექტები უკვე ამოქმედდა.

მექსიკა

მექსიკის ჯანდაცვის მდივანმა, დავიდ კერშენოვიჩმა ორშაბათს მედიას აეროპორტებში ებოლაზე შემოწმების გამკაცრებული ზომები წარუდგინა, საზოგადოებას კონგოში მოგზაურობისგან თავის შეკავებისკენ მოუწოდა და ამ ქვეყნიდან ჩამოსულებს 21-დღიანი კარანტინის დაცვა სთხოვა.