"ელექტროსისტემას ჩამორჩენა ჰქონდა..." - რატომ ჩაერთო ბიზნესი ქვესადგურის მშენებლობის თანადაფინანსებაში?
"დღევანდელი დღე იყო უპრეცედენტო, სადაც კერძო და საჯარო თანამშრომლობის ახალი მოდელი შეიქმნა",- ამის შესახებ „საქართველოს სახელმწიფო ელექტროსისტემის“ გენერალურმა დირექტორმა ვანო ზარდიაშვილმა ურბნისის ქვესადგურთან დაკავშირებულ მემორანდუმზე განაცხადა.
დღეს, ცნობილი გახდა, რომ ქვესადგურის პროექტს, რომელიც სახელმწიფო კომპანიას უნდა განეხორციელებინა, კერძო სექტორიც დააფინანსებს. ვანო ზარდიაშვილმა და ექვსი კერძო ენერგოკომპანიის წარმომადგენელმა ხელი მოაწერეს ურთიერთშეთანხმების მემორანდუმს, რომელიც ქვესადგური „ურბნისის“ ერთობლივ პროექტირებასა და მშენებლობას ითვალისწინებს. დაგეგმილია 220 კილოვოლტიანი ქვესადგურის მშენებლობა, რომელიც უზრუნველყოფს ქარის, მზისა და ჰიდროელექტროსადგურებიდან გამომუშავებული ელექტროენერგიის გადამცემ ქსელში ინტეგრაციას. შეთანხმების მიხედვით, კომპანიები საკუთარი ხარჯებით უზრუნველყოფენ სხვადასხვა ტექნიკური მოწყობილობის შეძენასა და მიწოდებას, ხოლო „საქართველოს სახელმწიფო ელექტროსისტემა“ განახორციელებს ქვესადგურის პროექტირებას, სამშენებლო და სამონტაჟო სამუშაოებს.
BMG დაინტერესდა, რა გახდა პროექტში კერძო სექტორის ჩართვის მიზეზი. როგორც ბიზნესი განმარტავს, ეს პროექტის გაჭიანურებას უკავშირდება.
„საქართველოს განახლებადი ენერგიის განვითარების ასოციაციის“ გამგეობის თავმჯდომარე გიორგი აბრამიშვილი ამბობს, რომ ურბნისის ქვესადგურის მშენებლობის დაფინანსებაში ბიზნესის ჩართვა პროექტის ვადებთან დაკავშირებულმა გარემოებებმა განაპირობა. როგორც მან BMG-სთან განაცხადა, საქართველოს სახელმწიფო ელექტროსისტემას ქვესადგურის განხორციელებაში ჩამორჩენა ჰქონდა, ბიზნესი კი ხარჯების გაწევას საკუთარი საჭიროების გათვალისწინებით დათანხმდა.
"აღნიშნული პროექტი საქართველოს სახელმწიფო ელექტროსისტემის წინა მენეჯმენტის პირობებში უნდა დაწყებულიყო, თუმცა სამწუხაროდ ეს ვერ მოხერხდა, რამაც ვადების გაჭიანურება გამოიწვია. ჩამორჩენა ჰქონდათ თავის დადებულ პირობებთან შეფარდებით. იქიდან გამომდინარე, რომ ძალიან ბევრი პროექტი იყო დაწყებული ბიზნესის მხრიდან და მათი განხორციელება სხვადასხვა ეტაპზე იყო, კრიტიკულად მნიშვნელოვანი გახდა ქვესადგურის პროექტის განხორციელება. მისასალმებელია, რომ საქართველოს სახელმწიფო ელექტროსისტემის მენეჯმენტმა სრულად გაიზიარა კერძო სექტორის ხედვა და პროექტის დროული განხორციელება მათაც პრიორიტეტად დაისახეს. სწორედ ამ ურთიერთთანამშრომლობის ფარგლებში დავდეთ აღნიშნული შეთანხმება.