ენერგეტიკის დარგში ბევრი გამოწვევაა, რაც პროექტების მშენებლობას აყოვნებს - გიორგი შუკაკიძე
ენერგეტიკის სექტორის ინვესტორები ამბობენ, რომ გენერაციის ობიექტების მშენებლობა გაძვირებულია.
როგორც „ენერჯი დეველოპმენტ ჯორჯიას” და „გრინ ენერჯი ჰოლდინგის“ მმართველმა დირექტორმა “საქმის კურსის” ეთერში განაცხადა, ფასები გაზრდილია როგორც ტექნიკური მოწყობილობების, ასევე საკადრო რესურსის მიმართულებით, რაც საბოლოოდ ინვესტორებს გენერაციის ობიექტების მშენებლობას უძვირებს.
გიორგი შუკაკიძის თქმით, აღნიშნულის გათვალისწინებით, რიგ შემთხვევაში ეკონომიკის სამინისტროსთან გაფორმებულ მემორანდუმებში დაფიქსირებული ტარიფები შესაძლოა, საკმარისი აღარ ობიექტების ასაშენებლად, ამიტომ აუცილებელია, მთავრობის მხრიდან დარგის მეტი მხარდაჭერაა საჭირო.
მისივე თქმით, ენერგეტიკის ინვესტორებისთვის კვლავ გამოწვევად რჩება ბიუროკრატია, საბოლოოდ კი ამ პრობლემების ერთობლიობა გენერაციის ობიექტების მშენებლობას აფერხებს.
“ენერგეტიკის დარგში ბევრი გამოწვევაა. მაგალითად, ბიუროკრატია, ხშირ შემთხვევაში ხდება დაყოვნებული გადაწყვეტილებები, რასაც შემდეგ მოჰყვება პროექტის უფრო გრძელ ვადაში განვითარება, რაც ფინანსურად ცალსახად აისახება ინვესტიციაზე. ფინანსურ პროდუქტებზე დღეს არსებული საპროცენტო განაკვეთები ერთ-ერთი ხელის შემშლელი გარემოება შეიძლება იყოს და ასევე გაძვირებული მშენებლობის ღირებულება დარგში. როგორც ადამიანური რესურსის ნაწილში, ასევე მოწყობილობების და თუნდაც საწვავის მიმართულებით. ახალი დამატებითი რეგულაციები შემოდის ჩვენს ქვეყანაში და ცალსახად უფრო მეტ დროს მოითხოვს, თუნდაც კვლევით ნაწილში, პროექტების განვითარების კუთხით. ჯამურად ასეთი გამოწვევები არსებობს, რომელიც აყოვნებს ზოგადად ბევრი [ენერგო] პროექტის განხორციელებას.
თუ ეს დარგი გვინდა განვავითაროთ ისე, როგორც გაცხადებული არის სახელმწიფოს მხრიდან, მათ შორის ობიექტების მშენებლობის ნაწილში, მაშინ ცალსახად რაღაც უფრო მეტი მხარდაჭერის მექანიზმები დასჭირდება ბიზნესს, რომ დროულად მოხდეს პროექტების განვითარება, ეს დამატებითი ფინანსური ტვირთი არ დააწვეს ბიზნესს. ასევე, გარანტირებული შესყიდვის ხელშეკრულებების ტარიფის ნაწილში თუ მოხდება მცირე კორექტირება, ეს ხელს შეუწყობს და უფრო დააჩქარებს ამ პროცესებს”, - განაცხადა გიორგი შუკაკიძემ.