ერაყი და საამიროები ჰორმუზის სრუტის ალტერნატიულ ნავთობსადენებს აფართოებენ

ჰორმუზის სრუტის ჩაკეტვისა და სპარსეთის ყურეზე არსებული გეოგრაფიული დამოკიდებულების ფონზე, ერაყი და არაბთა გაერთიანებული საამიროები ალტერნატიული ნავთობსადენების მშენებლობისა და გაფართოების გეგმებს ახორციელებენ.

როგორც ირკვევა, ერაყის მინისტრთა კაბინეტმა ქურთისტანი-თურქეთის ნავთობსადენის ქსელის საშუალებით ნედლი ნავთობის ექსპორტის დაჩქარების გეგმა ოფიციალურად დაამტკიცა. პროექტის მიხედვით, არსებული მიწოდება დღეში 220 000 ბარელიდან 770 000 ბარელამდე გაიზრდება, რაც ქურთისტანის გავლით თურქეთის ხმელთაშუა ზღვის ჯეიჰანის პორტამდე ალტერნატიულ მარშრუტს წარმოადგენს. სრული სიმძლავრით ამუშავების შემთხვევაში, ეს გზა მნიშვნელოვან შეღავათს მისცემს ნავთობზე დამოკიდებულ ერაყის ეკონომიკას.

საყურადღებოა, რომ ალტერნატიული საექსპორტო მარშრუტების განვითარება ინფრასტრუქტურაში მასშტაბურ ინვესტიციებთან ერთად დიდ დროსაც მოითხოვს, რადგან ტრანსნაციონალური მილსადენების გაყვანა რამდენიმე სახელმწიფოს შორის სპეციალური შეთანხმებების გაფორმებას საჭიროებს.

პარალელურად, ახალი ნავთობსადენების პროექტებზე მუშაობს საამიროებიც, რომლის ხელისუფლება ამჟამად 3 განსხვავებულ პროექტს განიხილავს. აღსანიშნავია, რომ OPEC-ის დატოვების შემდეგ, ქვეყანას არჩევანის თავისუფლება მნიშვნელოვნად გაეზარდა, რადგან მას აღარც წარმოების კვოტის დაცვა მოუწევს და არც მიწოდების ჯაჭვის საუდის არაბეთთან შეთანხმება.