ეროვნული ბანკი რეზერვებში ოქროს წილის 16%-დან 25%-მდე ზრდას განიხილავს

საქართველოს ეროვნული ბანკი ქვეყნის სავალუტო რეზერვებში ოქროს წილის ზრდას განიხილავს - ამის შესახებ პარლამენტის პლენარულ სხდომაზე სებს პრეზიდენტმა ნათია თურნავამ განაცხადა. მისი თქმით, ოქრო ამჟამად რეზერვების 16.4%-ს, ანუ $1.06 მილიარდ დოლარს შეადგენს, რაც მომდევნო პერიოდში უნდა გაიზარდოს და აღნიშნული საპროგნოზო მაჩვენებელი მთლიანი რეზერვების (6.47 მილიარდი დოლარის) 25%-ია. შესაბამისად, სებ-ი განიხილავს რომ დამატებით შეისყიდოს დაახლოებით 500 მილიონი დოლარის ღირებულების რეზერვები.

"მთავარი რაციონალი იყო ჩვენი სავალუტო რეზერვების დივერსიფიკაცია. სხვათა შორის, ბოლო პერიოდში ეს გადაწყვეტილება მიიღო მთელი რიგი წამყვანი ქვეყნების ცენტრალურმა ბანკებმა. ზოგს ისტორიული მარაგი ჰქონდა წლების წინ დაგროვილი, ზოგმა ახლახან შეისყიდა, თუმცა თუ შეხედავთ სტატისტიკას, მზარდია რეზერვებში ოქროს წილი.

გაზრდილი გარე შოკებიდან თუ არაპროპროგნოზირებადობიდან გამომდინარე, ოქრო არის ის აქტივი, რომელიც გრძელ ვადაში კარგად ინარჩუნებს თავის ღირებულებას, ფასი მოკლე ვადაში ვოლატილურია, მაგრამ გრძელ ვადაში, 20-25 წლიან პერსპექტივაში ინფლაციური რისკების ჰეჯირებას ანუ დაზღვევას ახდენს, აქედან გამომდინარე მივიღეთ ჩვენც ეს გადაწყვეტილება. ოქროს წილი ჩვენს რეზერვებში არ არის მაღალი, დღეისთვის 16.4%-ია და 25%-მდე ვვარაუდობთ მის შენარჩუნებას. თუმცა, რეზერვების შესყიდვა იმდენად მაღალი ტემპით მიმდინარეობს, რომ შევეცდებით რომ გავზარდოთ ეს აქტივი ჩვენს რეზერვებში. რაც შეეხება ციფრებს, რაც დაიხარჯა მის შესყიდვაში, ერთი ამდენი ჩვენ უკვე მოვიგეთ, თუმცა მოკლევადიანი მოგება არ ყოფილა ჩვენი მიზანი, ჩვენი მიზანია დივერსიფიკაცია რომ სხვადასხვა სახის აქტივები ვიქონიოთ ჩვენ პორტფელში,"- განაცხადა ნათია თურნავამ.

სებმა 500 მილიონ დოლარად 7 ტონა მონეტარული ოქრო 2024 წლის გაზაფხულზე შეიძინა. ამ დროისთვის აღნიშნული ოქროს საბაზრო ღირებულება 1.06 მილიარდ დოლარს შეადგენს, რაც გასულ პერიოდში ოქროს ფასის მკვეთრმა ზრდამ განაპირობა.