"ეს არის უნიკალური შემთხვევა, როდესაც ლას-ვეგასის ბრენდი შემოდის ჩვენ რეგიონში" - Block Group-ის გენდირექტორი

"ეს არის უნიკალური შემთხვევა, როდესაც ლას-ვეგასის ბრენდი აფორმებს ხელშეკრულებას და შემოდის ჩვენ რეგიონში", - ამის შესახებ გადაცემა "ბიზნესის კვირეულში" Block Group-ის გენერალურმა დირექტორმა თორნიკე ჯანაშვილმა Planet Hollywood-ის საქართველოში შემოსვლაზე საუბრისას განაცხადა.

საქმე ისაა, რომ საერთაშორისო ჯგუფი Planet Hollywood Resorts International, რომელსაც ლას-ვეგასში მოქმედი Planet Hollywood Las Vegas Resort & Casino ეკუთვნის, თბილისში თავის პირველ პროექტს იწყებს. კერძოდ, კავკასიის რეგიონში პირველი Planet Hollywood Hotel & Casino თბილისში, Central Park Towers-ში იხსნება. პროექტს საქართველოში Orbi Group-ი და Block Group-ი ახორციელებს.

"ჩვენ შევძელით, დავითანხმეთ და უკვე 40-წლიანი ხელშეკრულება გავაფორმეთ Planet Hollywood-თან. ამ ხელშეკრულების პირობებში Planet Hollywood-ი მართავს ამ სასტუმრო ნომრებს, ეს არის Central Park Towers-ის B ბლოკი. ასევე ამ ხელშეკრულების პირობებში ჩვენ მოგვეცა საშუალება, რომ უშუალოდ ინვესტორებს შევთავაზოთ ეს კონკრეტული სასტუმრო ნომრები. მინდა დავაკონკრეტო, რომ ინვესტორებს შეუძლიათ შეიძინონ კონკრეტულად Planet Hollywood-ის სასტუმრო ნომრები. ჩვენს ქვეყანაში მსგავსი საინვესტიციო შეთავაზებების მოკლებულები ვართ. შესაბამისად, ინვესტორებს შეუძლიათ შეიძინონ პრაქტიკულად საქართველოში გლობალური ბრენდის ნაწილი, ამ შემთხვევაში Planet Hollywood-ის სასტუმრო ნომერი.

ჩვენ შევძელით, რომ 250 000-დოლარიანი ნომერი, პირველ 100 ინვესტორს, შევთავაზოთ 150 000 დოლარად. პროცენტულად რომ ავიღოთ, დაახლოებით 35 000-დოლარიანი შემოსავალი ნომერზე გათვლილი იყო 250 000 დოლარიდან ზემოთ ღირებულების არსებულ ნომერზე. შესაბამისად, 35 000 დოლარის ამონაგები, უკვე 20-ზე მეტი პროცენტი გამოდის წლიურად.

ასევე მინდა აქვე ხაზი გავუსვა ასევე ძალიან მნიშვნელოვან ფაქტორს. მისი რეალური ღირებულება, როდესაც ის ექსპლუატაციაში შევა, იქნება დაახლოებით 350-დან 400 ათას დოლარამდე", - განაცხადა თორნიკე ჯანაშვილმა.

რაც შეეხება პროექტის მიმდინარეობას, ყველა ბრენდთან ხელშეკრულებები გაფორმებულია, ორი 43-სართულიანი თაუერი აშენებულია, ამჟამად აქტიურად მიმდინარეობს მიმდინარეობს ფასადის შემინვის და შიდა სარემონტო სამუშაოები. კომპლექსის დასრულება და მისი გრანდიოზული გახსნა 2027 წლის სექტემბერში იგეგმება.