Estée Lauder-მა Puig-თან გაერთიანების მოლაპარაკებები შეწყვიტა

კოსმეტიკური საშუალებების ამერიკულმა მწარმოებელმა Estée Lauder-მა და პარფიუმერულმა კომპანია Puig-მა გაერთიანების შესახებ მოლაპარაკებები შეწყვიტეს. არსებული ინფორმაციით, მოლაპარაკებების პროცესი ბრენდ Charlotte Tilbury-ს დამფუძნებლის მოთხოვნებმა გაართულა. ის პოტენციური გარიგების სტრუქტურის მნიშვნელოვნად შეცვლას ითხოვდა, რასაც მოპასუხე მხარე არ დაეთანხმა.

ცნობისთვის, მხარეებს შორის დაგეგმილი გარიგების შედეგად $40 მილიარდის ღირებულების ფუფუნების საგნების მწარმოებელი გიგანტი უნდა შექმნილიყო. ის ბაზრის ლიდერ L'Oreal-თან კონკურენციაში შესვლას შეძლებდა.

მოლაპარაკებების ჩაშლის შემდეგ Estée Lauder-მა საუბარი დაიწყო ახალ გეგმაზე, რომლის ფარგლებშიც კომპანიის მესვეურები ძალისხმევას შიდა რეორგანიზაციაზე მიმართავენ.

ამერიკული მწარმოებლის ამ გადაწყვეტილებას ბაზარზე პოზიტიური რეაგირება მოჰყვა. ინვესტორებმა მოიწონეს მენეჯმენტის უარი იმ რისკებზე, რომლებსაც შესაძლოა კომპანიის განვითარება შეეფერხებინა.

შეგახსენებთ, ამერიკულ ბრენდს შესყიდვების განხორციელების დიდი ისტორია აქვს. ამ სტრატეგიის ფარგლებში კომპანიამ 2022 წელს Tom Ford-ის სავაჭრო მარკა $2.8 მილიარდად შეიძინა.