ევროკავშირის 11 ქვეყანა რეზერვებიდან 20.5 მილიონ ბარელ დიზელს გამოყოფს

ევროკავშირის თერთმეტი ქვეყანა 2027 წლის იანვრის ბოლომდე სტრატეგიული რეზერვებიდან 20.5 მილიონი ბარელი დიზელის გამოყოფის პირობას დებს. გადაწყვეტილება ახლო აღმოსავლეთში არსებულ არასტაბილურობას უკავშირდება, რაც ზამთრის მოახლოებასთან ერთად საწვავის მომარაგების გამო ბუნდოვანებას ზრდის - ამის შესახებ ნათქვამია დოკუმენტში, რომელიც Euronews-მა მოიპოვა.

ბელგია, დანია, საფრანგეთი, გერმანია, საბერძნეთი, იტალია, ლიეტუვა, ლუქსემბურგი, ნიდერლანდები, პორტუგალია და შვედეთი დიზელის დამატებითი მარაგების გახსნაზე "დიდი შვიდეულის" (G7) ლიდერების ენერგოუსაფრთხოების განცხადებისა და ენერგეტიკის საერთაშორისო სააგენტოს (IEA) გადაუდებელი მოწოდების შემდეგ შეთანხმდნენ.

"ჩვენ, ენერგეტიკის საერთაშორისო სააგენტოს წევრი ევროკავშირის ქვეყნები, გადამჭრელ ზომებს ვიღებთ, რათა მოკლევადიან პერსპექტივაში ნედლი ნავთობისა და გადამუშავებული პროდუქტების მიწოდება სტრატეგიული რეზერვებიდან, მათ შორის დიზელის მნიშვნელოვანი მოცულობების გამოყოფით გავზარდოთ", - ნათქვამია ერთობლივ დეკლარაციაში.

ინიციატივა საფრანგეთის ენერგეტიკის მინისტრმა როლან ლესკიურმა 29 ოქტომბერს, ლუქსემბურგში ენერგეტიკის მინისტრების შეხვედრის ფარგლებში წარადგინა.

დოკუმენტი მარტში 42.6 მილიონი ბარელი ნავთობისა და ნავთობპროდუქტების გამოყოფას ითვალისწინებს კოლექტიური მოქმედების ფარგლებში, რომელსაც პარიზში ბაზირებული IEA კოორდინირებს. გადამუშავებული პროდუქტების თითქმის ნახევარი დიზელია, რომლის ბაზარსაც ევროკომისიის ნავთობის მონიტორინგის ჯგუფი "მკაცრად შეზღუდულად" აფასებს.

მიუხედავად იმისა, რომ ბრიუსელი "ფიზიკურ დეფიციტს" არ პროგნოზირებს, ენერგეტიკის ევროკომისარი დენ იორგენსენი აცხადებს, რომ მკვეთრად გაზრდილი ფასები საბოლოოდ ყველაზე მოწყვლად ფენებს დააზარალებს.