ევროკავშირის ექვსმა ქვეყანამ ფინანსური ბაზრების ინტეგრაციაზე შეთანხმებას მიაღწია

ევროკავშირის ექვსმა უმსხვილესმა წევრმა სახელმწიფომ ფინანსური ბაზრების ინტეგრაციისა და ზედამხედველობის პაკეტზე მნიშვნელოვან შეთანხმებას მიაღწია. არსებული ინფორმაციით, გერმანიის, საფრანგეთის, ესპანეთის, იტალიის, პოლონეთისა და ნიდერლანდების ფინანსთა მინისტრებმა ბერლინში გამართულ მოლაპარაკებებზე პოზიციების შეჯერება, აზრთა სხვადასხვაობის მიუხედავად მაინც შეძლეს. Reuters-ის ცნობით, ეს გადაწყვეტილება ევროპული ბლოკის ერთიან, უოლ-სტრიტის სტილის მსგავს, მძლავრ საინვესტიციო სივრცედ გარდაქმნას შეუწყობს ხელს.

მნიშვნელოვანია ითქვას, რომ მოლაპარაკებების დროს ერთ-ერთ მთავარ სადავო საკითხად ევროპის ფასიანი ქაღალდებისა და ბაზრების ორგანოსთვის, ESMA-სთვის ზედამხედველობის უფლებამოსილების გაფართოება მიიჩნეოდა. საფრანგეთი და ესპანეთი სტრუქტურისთვის ახალი ბერკეტების დაუყოვნებლივ გადაცემას ითხოვდნენ, იტალია და ნიდერლანდები კი რვაწლიან გარდამავალ პერიოდს ემხრობოდნენ. მხარეები უფლებამოსილების მაქსიმალურად მოკლე ვადებში გაზრდაზე შეთანხმდნენ, თუმცა კონკრეტული თარიღები დოკუმენტში არ გაუწერიათ. რაც შეეხება თავად გერმანიას, ფინანსთა მინისტრის განცხადებით, ქვეყანა კომპრომისულ გადაწყვეტილებას მიემხრო.

ცნობისთვის, აღნიშნული საინვესტიციო გეგმა ევროკავშირში უკვე ათი წელია განიხილება, თუმცა პროცესს ირლანდიისა და ლუქსემბურგის წინააღმდეგობა აფერხებდა. აღსანიშნი ფაქტია, რომ საბოლოო გადაწყვეტილების მიღება 15 ქვეყნის თანხმობას მოითხოვს.